Champion lawmnaah mipui an ṭhahnem

T20 World Cup champion India team chuan July 4, Ningani khan Mumbai an rawn thleng a, zan lamah open-bus parade neiin Marine Drive khat tlat mipui an pungkhawm. Champion lawmna kum 2007-a T20 World Cup an champion hmasak zawk nen a inang hle.

India captain Rohit Sharma chuan, "Boruak a inang lo. Kum 2007 kha chu chawhnu a ni a, tun ṭumah chuan zan a ni thung. Ka champion hmasak ber a nih avangin kum 2007 kha ka ngaihlu a, tun ṭumah erawh captain ka nih avangin ka tan a hlu zual," tiin a sawi.

India team hian Wankhede Stadium-ah a tawp an khar a, 2011 ODI World Cup an champion-na hmun stadium khat vek hi mipui an pungkhawm. Rohit chuan, "World Cup kan champion-na hmunah nomawi kan hawn leh thei hi ka ngai hlu hle. Hmaih bik neih ka duh lo a, chutihrualin nomawi chawi theih nan player-te an thawh hlawk em em a ni," tiin a sawi.

Kum 2007-a bus parade-ah khan Wankhede Stadium thleng turin darkar ruk an mamawh a, captain MS Dhoni chuan, "Airport kan chhuahsan a, mipui pungkhawm ka hmuh khan, kan champion hlutzia kha ka hrechiang chiah," tiin a sawi. Tun ṭumah hian bus parade an neihna kawng hi tawi hret mah se mipui pungkhawm erawh a inang khat hle.