Arsenal-in Raya an la nghet

Season liam taa Arsenal-in loan hmanga Brentford aṭanga an hawh goalkeeper David Raya chu pound maktaduai 27-in an lalut. Kum 28 mi Raya hian Premier League match 16-ah clean sheet neiin golden glove a dawng a, goal 16 chauh a chhuah.

Raya-a'n loan hmanga Arsenal a zawm hma hian goalkeeper nghet an nei a, English keeper Aaron Ramsdale-a'n league match zawng zawng khel vekin clean sheet 14 a nei. Mahse, Mikel Arteta-a'n duh thlan tur neih a duh a, Raya leh Ramsdale ten khelhna hmun inchuhin Spanish keeper a dingchang ta zawk.

Euro 2024-ah Raya hi Spain squad-ah a tel a, mahse goalkeeper Unai Simon a awm avangin match khat chauh a la inlan. Arsenal keeper hi group stage-a Albania nen an inkhelh ṭumin a inlan a, goal a chhuah lo.

Raya hi Blackburn Rovers aṭanga inzir chhuak niin Brentford-ah hming a chher a, Bees hi Championship aṭangin Premier League a kaipui. Spanish keeper chuan, "Kum nga chhung Brentford tana ka khelh hnuin chona thar hmachhawn turin ka chhuahsan dawn. He club-a ka hun tawn zawng zawng avangin ka lawm a, ka thinlungah Brentford hian hmun a chang reng tawh ang," tiin a club hlui a thlah.