Everton-in Allan leh Doucoure an duh

Premier League club Everton chuan English top flight league-a 'Big Six' chu 'Big Seven' a kaisantir tumin sum hmanna tur an zawng zel a, Napoli midfielder Allan leh Watford player Abdoulaye Doucoure-te chu lakluh tumin an hel. 

Toffees boss Carlo Ancelotti hian Napoli a enkawl lai khan Allan hi a lo hrechiang tawh a, Brazil international hi Atletico Madrid pawhin lakluh duh mah se a pu hlui bula khel turin Merseyside-a kal a hnial lo niin Italian media-te chuan an sawi. 

Everton hian kum 29 mi Allan chungchangah Napoli chu inbiakna an neihpui mek a, Serie A club-in pound maktaduai 30 an chhiar hi English club-in an thehchhuah phal chuan harsatna a awm lo ang. 

Kum 27 mi Doucoure hian Premier League aṭanga an tlak hnuah Watford chhuahsan a duh nia sawi a awm a, Hornets (Watford sawina) hian pound maktaduai 25 tal hmuh theih an inbeisei.