A hun tea rah ṭhin England an chak
Semifinal an lut tawh a, England-in an ṭhat dan ber an la hre lo! Mahse, inkhela pawimawh ber chu game mawi ni loin chak a ni a, Three Lions inkhel hi hmuhnawm lo ṭhin mah se, an chak ṭhin miau a, sel loh theih loh, fak hleihtheih chuang bawk si lo an ni ber!
Inrinni zan khan Euro quarterfinal-ah England hian Switzerland chu penalty hmangin an pet chhuak a, Gareth Southgate-a hnuaia Euro an hmachhawn pahnihah semifinal an lut ve ve tihna a ni - sawi nep theih a ni lo.
Three Lions hian Swiss team laka chak tur erawhin vanneihna an mamawh. Hun tawp nan minute 15 chauh a awm tawh tihah Breel Embolo chuan Swiss team tan goal hmahruai a khung a, minute nga hnuah Bukayo Saka chuan si phurh a sut.
Extra time khelh hnuah pawh goal dang a luh belh lo a, penalty hmanga chak zawk zawn a ni - Switzerland tana pet hmasa bertu Manuel Akanji chuan a hlah laiin, England player-ten an khung vek a, 5-3 a chakin semifinal an lut.
Ruahmanna thar
England-in group stage-ah game hmuhnawm min entir thei lo a, vawi khat chiah an chak - round of 16-ah Slovakia an hneh leh hram a, result nei reng chung siin beisei an phak lo. Tun inelnaah minute 90 chhunga chak chu vawi khat chiah an nei!
Hrem vanga Marc Guehi a chhawr thei lo bawk nen England boss Southgate-a'n quarterfinal-ah a formation 'hmangaih' 4-2-3-1 thlauh thlain, 3-4-2-1 a rawn hmang a, wing back ṭangkaina tur inkhelah rin loh takin midfield-a a chhawr ṭhin Trent Alexander-Arnold a hmang lo leh lawi a!
Saka pawhin wing back hna rawn chelhin, a khel pangngai viau a, tlarhmaa maltlat Harry Kane hmuh tur a awm lo tluang zel a, Jude Bellingham leh Phil Foden hi Three Lions tana Steven Gerrard leh Frank Lampard ang chauh kha an ni mai ang, tih a hlauhawm zawk ta hial.
Ṭum dang zawng aiin England hian bul chu an ṭan ṭha ngei a, mahse, a rei tawlh tawlh a, an hmuhnawm lo tawlh tawlh emaw tih mai tur a ni. Swiss team lahin an tih tur an hre chiang a, Saka goal khung kha England-in target-a shot an neih hmasak ber a ni!
A changtupa
Team pahnihin chance hlauhawm tia sawi tur an nei mumal meuh lo a, minute 44-naa Saka siamsak Kobbie Mainoo-a pet Granit Xhaka-a'n a lo dansak hman erawh Xhaka hian a tiṭha takzet - goal awm loin chawlhlawk hman a ni a, inkhel hmuhnawmna tem tur a awm lo.
Second half-ah Switzerland an hmuhnawm ta zawk a, a nawr tur zawka ngaih England an bet ta zawk - minute 75-naah Swiss team hian goal an khung ta nge nge. Ruben Vargas-a'n Ezri Konsa kap karah ball thlawh lutin, hei hi John Stones chuan a lo dang per.
Ball per lehlam hi Embolo chuan tlu chungin goal-ah a chantir a, England fans an hawihai. Southgate-a'n 'risk' lak hun tih a hria a, Kieran Trippier, Kobbie Mainoo leh Konsa la chhuakin, Eberechi Eze, Luke Shaw leh Cole Palmer a luhtir a, England inkhel a nung sawt.
Three Lions hian si phurh sut turin an nghah rei pawh a ngai lo. Minute nga hnu lawkah Declan Rice-a ball pek chu Saka-a'n ṭha zeta a insiamrem hnuin goal-ah a pet a, goal mawi bik a khung - England an vannei hle.
An chak ta
Minute 90 chhungin goal dang a lut lo a, extra time khelh a ni - Arsenal midfielder Rice-a'n minute 95-naah yard 30 vela hla aṭangin ṭha zetin shot a nei a, Inter Milan keeper Yann Sommer-a thiamzia lanna mai a ni.
Minute 117-naah England thin a phu rang kher mai. Bench aṭanga luhtir, Liverpool midfielder hlui Xherdan Shaqiri chuan ball pet a la thiam reng tih pholangin corner a pet a, bar a pet per - a kual lut teuh hle.
Switzerland tan Zeki Amdouni chuan chance duhawm a nei ve leh bawk a, mahse, Jordan Pickford a paltlang lo. Hun tawp thlengin goal dang a lut lo a, penalty pet a ni - Swiss team tana pen chhuak hmasa ber City defender Akanji-a pet a nem hret a, Pickford-a'n a dansak.
England tan Cole Palmer, Jude Bellingham, Saka, Ivan Toney leh Trent Alexander-Arnold ten inringtawk takin an chhuih lut vek a, Akanji hnua pettu Fabian Schar, Shaqiri leh Amdouni ten chhuih goal ve mah se awmzia a nei phak lo.
"Tournament pali kan hmachhawn ho zinga pathumah semifinal kan lut a, kan theihtawp chhuahin, he zinkawng hi hlim takin kan zawh zel ang. Thil dang hlen duh kan la nei cheu - England pawnah Euro final kan la lut ngai lo a, Euro-ah kan la champion lo bawk. Thil thleng ngai lo pahnih thlentir kan duh a ni."
- Gareth Southgate,
England manager
"Theihtawp kan chhuah a, kan chance neih zozai ka thlir khan, heti maia kan tawp hi chu a na takzet a ni. Ṭha takin inelna kan hmachhawn a, heti maia kan puanthuah tel a ngai tur hi ka player leh kan ram ka tawrhpui hle."
- Murat Yakin,
Switzerland boss