Brazil pet chhuaktu Uruguay

Football thiam ram an ni a, world champion vawi nga an ni tawh bawk - mahse tun hnaiah Brazil an ropui thei tlat lo! Dorival Junior enkawl Brazil hi Uruguay hneh loin Copa America 2024 quarterfinal aṭanga petchhuah an ni.

Nimin zing quarterfinal inkhelah Brazil leh Uruguay ten goal an khung lo, penalty shootout hmanga chak zawk zawn niin Brazil tan Eder Militao leh Douglas Luiz ten an hlah a, 4-2 in Uruguay an tlang.

Marcelo Bielsa enkawl Uruguay an hmuhnawm ṭhin, hun tawp hma minute 15 la awmah Nahitan Nandez chu hnawhchhuah a ni, defender pawimawh pakhat tel lo pawhin Brazil an dang tluan thei, semifinal-ah chuan Colombia an hmachhawn leh dawn a ni.

Penalty dangtu Uruguay goalkeeper Sergio Rochet chuan, "Team ṭha lakah player kim loin a tawp lamah hun kan hmang a ni a, a awlsam loh dan tur chu inkhel ṭhin chuan an hria ang. Kim lo mah ila kan rilru kha a paukhauh tlat.

"Team pumpui kan khel ṭha, player leh coaching staff mai bakah Uruguay mipuiten he hnehna hi an phuin an tan a ni," a ti. Rodrygo a tihtluk avanga hnawhchhuah Nandez tel loa an ṭang tluan thei chu a lawm hle.

Brazil hian hliam vangin Neymar chu an hruai ve thei lo a, ram tana goal khung tam ber a awm loh takah chuan Vinicius Junior lakah mawhphurhna a lian. Mahse, Real Madrid star hian hrem vangin Uruguay a hmachhawn thei ta si lo a, a tel lohna Brazil tlarhma an hriam lo a ni.

Uruguay hian midfield aṭanga inkhel khaikhawm turin Federico Valverde an nei a, an ṭhatpui ṭhin. Liverpool striker Darwin Nunez chu hun ṭha bera chhal theih hmutu a ni a, mahse goal bar chungah a tauh chhuak, goal khung lo mah se a tawpah an duh an hmu ta tho.

Quarterfinal inkhel dangah Colombia chuan Venezuela chu 5-0 in an sawp ve thung. State Farm Stadium, Glendale, Arizona-a inkhelah James Rodriguez a la hmuhnawm reng, goal a khung bakah a ṭhiante khung tur vawi hnih a siamsak.

James hian Jhon Cordoba leh Liverpool forward Luis Diaz tan a siamsak a, goal dang pahnih hi Richard Rios leh Miguel Borja te khung a ni thung - Brazil hnehtu Uruguay lakah pawh an tlarhma lam hi chu an ngaihtuahawm lo ang.

Tournament kal laia ṭhiante goal khung tur vawi nga siamsak tawhtu Rodriguez chuan, "Goal kan khung hma avangin inkhel kan thunun theih phah. Copa America hi a ṭha thei anga bera khelh a, kan ram tana nomawi hlawhchhuah kan duh," a ti.

Copa America semifinal hi July 10, Nilaini zingah an khel chhunzawm leh ang a, semifinal hmasa zawkah champion lai Argentina leh Canada te an inhmachhawn ang.