German ral lian tur daltu Spain

Germany-in an ram ngeiah European Championship nomawi chawi an tum a, an thawm pawh a ring hle. Mahse, German ral lian tur inṭham chho mek hi Spain lakah a tham ral. La Roja hian July 9, Thawhlehni zan semifinal-ah Portugal pet tlatu France an hmachhawn ang.

MHPArena, Stuttgart-ah Zirtawpni zan khan inkhel hmuhnawm chhawpchhuah a ni. Luis de la Fuente hnuaia football mawina pholangtu La Roja-in Dani Olmo hmanga hma an hruaina chu Germany-in Florian Wirtz hmangin sut mah se extra time-ah Mikel Merino-a'n chakna goal a tauh lut. Spain 2-1 in an chak a, Germany an tla.

German an duh rum

Germany-in group stage-ah game mawi an khel a, quarterfinal-a Spain an hmachhawn ṭumah erawh an thiamna aiin an tharum an hmachhuan thung. De la Fuente naute erawhin rilru fim takin game mawi an rawn khel a, a hmuhnawm letling hle.

Ball pass thiam avanga khawvel hriat lar Toni Kroos-a'n hun rei lote chhungin Spanish player a thal hnem a, kum 21 mi Pedri phei chu minute riatnaah thlak a ngai hial. Barcelona midfielder Pedri tan Euro 2024 a tawp a, chutihrualin an rama haw mai loin team zingah a awm chhunzawm ang.

Mahse, Pedri hliam hi Spain tan malsawmna a tih theih. Pedri thlaktu Dani Olmo a rawn nung ṭha a, Nico Williams leh Lamine Yamal te nen Germany tlarhnung tan an hnawksak. Alvaro Morata hriam deuh se, first half-ah goal an khung thei hial ang. Chutihrualin Germany pawhin goal khung theihna remchang an nei a, goal hmaah Kai Havertz a hriam tawk lo.

Halftime-ah 'tactical change'

Germany-in second half ṭan chiahah Bayer Leverkusen duo Robert Andrich leh Florian Wirtz te an luhtir a, an khelh dan hmang thlak an tum tih a hriat theih. Spain pawhin hrem vanga semifinal khel thei lo tur Robin Le Normand la chhuakin Nacho an rawn luhtir a, Real Madrid defender hi pressure sang dawl thei tur a nih bakah match fitness mamawh a nih avangin thutlukna ṭha a ni.

Die Mannschaft aiin La Roja bawkin inkhel bul an ṭan ṭha leh a; Olmo, Fabian Ruiz leh Rodri te bawk an langsar. Morata-a'n chance ṭha hmasa hlah mah se minute 51-naah Yamal-a ball fing nang tura tlan lut ṭha Olmo-a'n goal hmahruai a khung.

Nagelsmann-a'n goal a mamawh tih hriain Niclas Fullkrug leh Maximilian Mittelstadt te a luhtir a, Spain-in goal venhim an ngaih pawimawh tawh bawk avangin inkhel an thunun ta hle.

Spain an talbuai a, Germany goal bawh a na zel. Havertz-a'n goalkeeper Unai Simon tlan chhuak hmu fuh mah se goal zawnah a pet lo. Mahse, minute 89-naah Mittelstadt-a cross luh chu Joshua Kimmich-a'n tauh letin Wirtz-a'n mawi zetin a volley lut. De La Fuente-a'n goal venghim turin player a thlak hnem hret a, Spain an buai phah.

Handball, Goal leh Red Card

Minute 90 chhungin chak zawk an awm lo a, extra time-ah pawh inkhel a nung ṭha hle. Hun pangngai tawp lama talbuai Spain an insiamrem a, extra time-ah an intluk tawk. Second half ṭan chiahah Jamal Musiala ball pet kawh ṭha zet chuan Marc Cucurella kut a per a, Germany-in penalty ni turah an ngai.

Mahse, Cucurella hian a kut hi phar chhuak loin a taksa lamah a dah thla a, ball dan tumna a neih loh bawk avangin tun ṭuma an dan hmanah chuan penalty tur a ni lo. VAR pawhin thil thlen dan a en ngei a, dan ang thlapin penalty a pe lo - Germany an vanduai.

Spain erawhin hun ṭha an bawhpelh lo. Minute 119-naah Olmo cross ṭha zet chuan Antonio Rüdiger khum chiahin vengtu nei lo substitute Mikel Merino-a'n goal kilah mawi zetin a tauh lut. Manuel Neuer-a tan en liam mai loh chu tih theih dang a awm lo.

Minute thum pek belh a ni a, Germany-in si phurh sut theihna hun ṭha an nei tho. Fullkrug-a vanneih zan a ni lo a, goal ngei tura ngaih chu goal pawnah chiah a tauh. Referee Anthony Taylor-a'n hun a pe belh rei hret a, Musiala ball la lut tur pawh thlutu Dani Carvajal-a'n yellow card vawi hnihna hmuin an hnawt chhuak.

Spain 2-1 in an chak, mahse semifinal-ah hrem vangin Carvajal leh Robin Le Normand te an khel thei dawn lo a, hliam vangin Pedri an chhawr thei dawn lo bawk. Captain Alvaro Morata erawh yellow card an pe anga TV lama tarlan chu tihsual vang a ni a, semifinal-ah a khel thei ang.

 Player Inlante

Spain: Unai Simón; Carvajal, Le Normand (Nacho 46'), Laporte, Cucurella; Pedri (Olmo 8'), Rodri, Fabián Ruiz (Joselu 102'); Yamal (Ferran Torres 63'), Morata (Oyarzabal 80'), Williams (Merino 80')

Germany: Neuer; Kimmich, Rüdiger, Tah (Müller 80'), Raum (Mittelstädt 57'); Can (Andrich 46'), Kroos; Musiala, Gündoğan (Füllkrug 57'), Sané (Wirtz 46'); Havertz (Anton 91')