Inkhel hmuhnawmah Netherlands an chak

Netherlands chuan Turkey lehthalin 2-1 in an chak a, Euro 2024 semifinal an lut. Olympiastadion Berlin-a inkhel hi quarterfinal match liah ngaihven hlawh lo ber anga ngaih theih ni mah se hmuhnawm bera chhaltu an ṭhahnem khawp ang.

Turkey-in huaisen takin bul an ṭan a, kum 19 mi Arda Guler chu an game mawitu a ni. Oranje hi chak tura rin ni mah se minute 35-naah Arda Guler-a cross chu defender Samet Akaydin-a'n a tauh lut.

Goal khung hnuah pawh Turkey an khel ṭha a, second half ṭantirha Ronald Koeman-a'n Wout Weghorst a luhtir hnuah Netherlands inkhel a nung chiah. Weghorst-a ball tauh chu Memhpis Depay-a'n a khung thei lo a, Oranje forward hi goal hmaah a hmui lo.

Turkey goal khung belhna remchang an nei a, goal hmaah an vannei tawk lo. Goal mamawh Oranje tan Liverpool forward Cody Gakpo chu hmuhnawm a tling. Minute 70-naah Depay-a cross ṭha chu Stefan de Vrij-a'n a tauh lut a, 1-1 a ni.

Inkhel hmuhnawm pangngai tak chu a nung leh sawt a, inkhel hmuhnawm bik a ni ta. Turkey insiamrem hmain Oranje-in goal an khung leh a, minute 76-naah Denzel Dumfries-a cross chu Gakpo-a'n a tihbuai vangin Turkish defender Mert Muldur-a'n an lamah a tilut.

Turkey-in siphurh sut ngei tumin minute li chhungin player pali an thlak a, an goal bawh pawh a na hle. Goal khung ngeina tur chance ṭha pawh an nei mawlh mawlh a ni ber. Substitute Mehmet Zeki Celik ball pet chu goalline-ah Micky van de Ven-a'n a dang hram a, substitute Muhammed Aktürkoglu ball pet pawh keeper Bart Verbruggen-a'n a dang.

Injury time thlengin goal chance ṭha bik a awm a, substitute Semih Kılıcsoy-a'n six yard box aṭanga a pet chu keeper Verbruggen-a'n a dang. Netherlands an ṭang tluan thei hram, kum 20 hnuah semifinal an lut. Oranje hian kum 1988 hnuah nomawi an la chawi leh lo.