France-in Euro 2016 phuba an la

Europe ram ṭha ber zinga mi France hian kum 2000 hnuah European Championship-ah nomawi an la chawi leh lo a, kuminah beisei angin khel ṭha lo mah se Kylian Mbappe awmna team hian Cristiano Ronaldo telna Portugal hnehin semifinal an lut.

Volksparkstadion, Hamburg-a inkhelah minute 120 chhungin goal a lut lo. Penalty shootout-ah France player-ten an pet goal vek laiin Portugal tan Joao Felix-a'n a hlah a, Les Bleus hi 5-3 in an vannei ta zawk.

A goal lo

Cristiano Ronaldo hoa khel Portugal-in bul an ṭan ṭha a, an khel ṭha zawk. Rafael Leao chu mual sirah a hmuhnawm a, Bruno Fernandes pawh che ṭha mah se goal khung tur khawpin an khel ṭha lo.

France thiampuipa Kylian Mbappe-a'n hmaikawr vuah hnuah a theihna ang tak a la lantir thei lo a, a tlan chakzia hmuh tur chu awm bawk mah se danglamna thlentu a ni lo. Mbappe-a'n vawi nga shot a neiah goal a khung lo a, hliamin a tihbuai bawk avangin minute 105-naah an thlak.

Les Bleus hian tun ṭum inelnaah hian 'open play' aṭangin khung an la nei lo a, an khingpuiten ṭum hnih an tih goal sak (own goal) baka Mbappe penalty hmanga a khung chu, hun pangngaia an khung chhun a ni.

Mahse, France tan defender William Saliba a khel ṭha zel a, goalkeeper Mike Maignan a rintlak bawk. Eduardo Camavinga pawh a hmuhnawm viau a, bench aṭanga rawn lut Ousmane Dembélé a khel ṭha hle.

Chutihrualin Portugal-in extra time ṭantirha Ronaldo hlah an ui khawp ang. Portugal captain hi mawi zetin amah vengtu Dayot Upamecano lak aṭangin tlan chhuak mah se Francisco Conceicão ball pass ṭha chu goal zawnah a pet lo.

Ronaldo khelh ṭhat zan a ni lo a, Robert Martinez-a'n bench-ah Diogo Jota leh Goncalo Ramos te nei mah se a khelh tluantir. Chutihrualin kum 41 mi Pepe a khel ṭha a, France laka goal an venhimna chhan pakhat a ni.

A chinfelna penalty

Portugal-in quarterfinal lut turin Slovenia 3-0 in an hneh a, Diogo Costa-a'n penalty shootout-ah vawi thumah vawi thum a dang. Mahse, France lakah erawh Costa-a'n dan a nei tawh lo. Les Bleus aiawha pettu Ousmane Dembele, Youssouf Fofana, Jules Konde, Bradley Barcola leh Theo Hernandez ten an khung vek.

Cristiano Ronaldo-a'n minute 120 chhung a tih tur ti tawk lo mah se penalty shootout erawh pen chhuak hmasa leh berin, a pet goal - European Championship-a a ball khawih hnuhnun berah a pet goal.

Ronaldo dawta pettu Bernardo Silva-a'n khung mah se Joao Felix-a'n goal ban a pet per. Nuno Mendes-a'n khung leh mah se Portugal tana pawi tur ang a pawi zo tawh. Euro C'ship-ah Ronaldo khel hmuh tur a awm dawn tawh lo a, France erawh kum 2000 hnua a vawi khat nan champion an inbeisei thung.

Player inlante

Portugal: Diogo Costa; Cancelo (Semedo 74'), Pepe, Rúben Dias, Nuno Mendes; Vitinha (Matheus Nunes 119'), Palhinha (Rúben Neves 90+2'), Bruno Fernandes (Francisco Conceição 74'); Bernardo Silva, Ronaldo, Rafael Leão (João Félix 106')

France: Maignan; Koundé, Upamecano, Saliba, Hernández; Kanté, Tchouameni, Camavinga (Fofana 91'); Kolo Muani (Thuram 86'), Griezmann (Dembélé 67'), Mbappé (Barcola 106')