MBA Official Championship-a ngaihven hlawh Rinhlui

NEXA GIG Motors MBA Official Championship 2024 (Junior & Senior) chu Inrinni khan a ṭiak ta - junior inelna chu June 25 - June 29 inkar khan neih tawh niin, senior inelna hi July 2, Thawhlehni khan ṭan ve leh a ni a, July 6, Inrinniah an zo.

Ramhlun Indoor Stadium-a neih inelnaah hian H. Lalrinhlui chuan women's singles inelna huangah champion thei naupang ber record a siam a, men's singles-ah Saitluangpuia Sailo a champion bawk.

A hming Rinhlui

Ramhlun Indoor Stadium-a neih inelnaah Rinhlui a langsar a, Chanmari West rawlthar hian final-ah tun inelnaa category pathum a final lut thei awmchhun, Ramngaihzuali, Ramhlun South, chu deciding game-ah 14-21, 21-12, 21-16 in a hneh a, a vawi khat nan Senior Official Championship lawmman pakhatna a la.

Chanmari Shuttlers Club (CSC) tana khel Rinhlui hi kum 15, thla 1 leh ni 12 mi niin, hmeichhe singles bika champion thei naupang ber Abigail Lalṭhazuali record lo siam tawh chu a khum - final-a a hneh tak, kum 17 mi Zualtei'n MBA tournament hrang hranga women's singles champion thei naupang ber record a chelh lai chu a khum tel.

Hei le Thartei

Women's doubles-ah Zoramthari Renthlei chuan record thar a siam ve bawk - CSC player Thartei hi women's doubles-ah Zualtei nen inkawpin, singles champion Rinhlui leh TC Lalṭhazuali te ṭangdun chu 21-14, 21-16 in an hneh a, an champion.

Champhai Vengthlang naupang, kum 14 mi Thartei hian senior category hrang hranga MBA Official Championship bakah ranking tournament-a champion thei naupang ber record thar a rawn siam bawk a ni. Rinhlui leh Thartei te hi TATA Trusts (NEIDA) leh MBA thawhhona a PGBA, Hyderabad-a training nei mek an ni.

Mipa champion Saitluangpuia

Saitluangpuia'n kum 2022 khan MBA Official Championship-a mipa inelnaah pakhatna ni thei naupang ber record a siam a, khatihlai khan kum 16 leh thla 10 mi chauh a ni - mahse, nikum lamah H. Lalṭhazuala'n a khum.

Mahse, kum 2024 a herchhuah meuh chuan Ramhlun Venglai rawlthar Tluangpuia'n a lalṭhutthleng a luah leh ta a, Sihphir BC shuttler hian quarterfinal-ah deciding game a khel tih loh chu straight set vekin hnehna a chang a, final-ah hian Bawngkawn BC shuttler Laldintluanga Tlau, Bawngkawn BC chu 21-8, 21-17 in a hneh.

Result dang

Men's doubles inelnaah Joseph VL Ringngheta, Mission Veng BC leh C. Lalramzauva, Bawngkawn BC te kum zawnin an champion a, final hmuhnawm takah 21-12, 10-21, 21-13 in Lalrinawma leh Laldintluanga Tlau, BBC te inkawp an hneh.

Mixed doubles inelna huangah veteran player, R. Lalbiaksanga, Mizoram Police BC leh Lalduhzuali, Durtlang BC te ṭangdun chuan official championship-a an vawi khat champion-na ni turin hnehna an chang a, Vanlalpekhlua Sailo, Chaltlang BC leh Ramngaihzuali, CSC te ṭangdun chu 22-20, 21-12 in, straight set-in an hneh a ni.

Record thar

Tun inelnaah hian record thar siam a awm nual - MBA Official Championship khel thei naupang ber record chu K. Lalrempuii leh Lydia Lalnunfeli, Saron BC ten an siam a, kum 12 mi ve ve niin, women's singles leh doubles category-ah an inlan ve ve.

Kum 56 mi niin Dr. Malsawmkima (Masky), Mission Veng Badminton Academy chuan inelna a hmachhawn a, Official Championship-a inlan thei upa ber record a siam - a fapa nen inkawpin Men's doubles-ah an inlan.

Ngaihhlut hlawh

Mizoram badminton-a inelna lian hian ngaihhlut a hlawh hle. Junior inelnaah player 215-in tournament an hmachhawn a, senior lamah shuttler 97 zet inlanin, match awm zawng zawng zat hi 367 a tling.

TATA Trusts (NEIDA) leh MBA thawhhona avanga hmun hrang hrang academy ṭhaa awm shuttler-te pawhin inelna hi hmachhawnin, a vaiin category 21-ah inelna kalpui a ni a, junior bikah semifinal lut chinten lawmman pawisa fai dawngin, senior inelnaah quarter final lut chinin an dawng vek bawk.