Set hloh mah se Djokovic a chak
Novak Djokovic tan vawi sarih a champion tawhna hmun meuh ni mah se la thil a awlsam vek bik lo, third round inkhel hmuhnawm takah Djokovic hian Alexei Popyrin chu 4-6, 6-3, 6-4, 7-6 (7-3) in a hneh.
Grand Slam vawi 24 champion tawh a ni a, atan Centre Court boruak hi thil thar a ni tawh lo. Mahse, player tawnhriat ngah tan pawh a awlsam vek thei bik lo, a match hmasa zawk ang bawkin set a hloh ve leh a ni.
Serbian star hian zanin hian fourth round a khel zui leh nghal dawn, champion thei tura beisei zinga mi Holger Rune a hmachhawn ang. Seeded 15-na Rune hian inkhel dangah Quentin Halys nen set nga an khelh hnuin hnehna a lo chang ve bawk.
Wimbledon vawi sarih champion tawh Djokovic chuan, "Chona hautak leh harsa tak chu a ni, taksa chauh ni loin rilru pawh a hah tel. A bik takin set lina kha a harsa, kumina tie break ka khelh tawh hoah chuan a ṭha ber a la ni hial ang.
"Tennis court chhunga lo kal tam tak khan England inkhel result an ngaihven tel tih ka hria, a chhan chu Switzerland nen penalty an pet mek vang a ni. Inkhel entute awm dan khan kan rilruah nghawng a nei ve bawk," a ti.
British miten football leh tennis an ngaina a, world number 1 hlui Djokovic te inkhelh lai hian Euro quarterfinal-ah England chuan Swiss an hmachhawn mek, an chak avangin Djokovic chuan Three Lions hi duhsakna a hlan ve bawk.
Inkhel dangah seeded pangana Daniil Medvedev pawh a chak - Russian star hian Grigor Dimitrov hmachhawn turin, a khingpui German mi Jan-Lennard Struff chu 6-1, 6-3, 4-6, 7-6 (7-3) in a hneh.
Mak tak maiin Giovanni Mpetshi Perricard pawh a la chak zel, midang an inkhelh theih loh avanga inlan ve hnuhnawh Perricard hian Emil Ruusuvuori chu 4-6, 6-2, 7-6 (7-5), 6-4 in a hneh. Open Era chinah lucky loser ni chunga Wimbledon fourth round lut thei pangana a ni.
German tlangval, seeded palina ni bawk Alexander Zverev pawhin Cameron Norrie a hneh a, a match lehpekah chuan Taylor Fritz a hmachhawn ang. Fritz hian a khingpui Alejandro Tabilo chu 7-6 (7-3), 6-3, 7-5 in a lo hneh ve thung.