Number 1 Swiatek a tla

Iga Swiatek tan Wimbledon champion nih a la harsa - hmeichhe tennis world number 1 hi world number 35 Yulia Putintseva hneh loin third round-ah a tla.

A zawna match 21 a chak hnuah Swiatek hian a tlawm ta a, a khingpui Putintseva lakah hian 3-6, 6-1, 6-2 in a chak lo. Season dang ang bawkin grass court season chu atan a la harsa chhunzawm a ni.

Swiatek hnehtu Putintseva chuan, "Ka tana match hnuhnung ber a ni thei tih hre chungin inelna ka hmachhawn, ka ball vuak te kha a tawpna a ni thei tih ka hre bawk. Mahse, mipuiin hmuhnawm an tih theih tur ang kha nuamti takin ka inkhel.

"Hun nuam leh hlimawm ka tawng a, tennis chuan hetiang hlimna hi min rawn thlen ve leh ṭhin a ni," a ti. A match lehpekah chuan seeded 13-na Jelena Ostapenko a hmachhawn ang, inkhel a hmuhnawm dawn.

World number 1 Swiatek hian engtin nge grass court-ah hlawhtlinna lian a chan theih ang tih chu zawhna lian a ni ta. Ama tihsual vanga a khingpuiin point a hmuh kha vawi 34 ngawt a ni a, a khingpui tihsual aṭanga a hmuh chu 18 chauh a ni thung.

Grand Slam vawi nga champion tawh a ni a, theihna a nei sangin tunlai bikah phei chuan midang chunga leng a ni. Wimbledon-ah beisei phak ta chiah lo mah se Paris Olympic atan rilru a seng thei dawn - atan Roland Garros khelhna hmun pan chu thil châkawm a ni ang.

Inkhel dangah Elena Rybakina chuan world number 1 hlui Caroline Wozniacki lakah game khat chiah a hloh a, tennis a khelh tawh a zawnga match ṭha bera ngaiahah 6-0, 6-1 a chakin fourth round a lut.