Johnkenty a inlan dawn

Bosch Home Appliances LPS Fight Night buatsaih turah HC Johnkenty Vanhlimpuia a inlan dawn tih a chiang ta a, a hmaa ding tur chu R. Malsawmtluanga a ni.

LPS Promotion chuan Mizo mipui hmuh chak inhnek chhawp chhuak turin hma a la a, eng emaw chen boxer pahnih a dawr hnuah Aizawla an rawn kirna tur leh an haw lehna tur bakah an lawmman tur chungchang sawiin Inrinni zan khan an inrem thei.

Pro Fight-a a bitum hneh vek leh vawi nga (2014-2019) champion thei Johnkenty Vana hi Indian Navy niin Delhi aṭangin Fight Night-a tel turin a rawn chhuak dawn a; ritchawi chak Jeremy Lalrinnunga te nen Indian Army Sports Institute, Pune-a awm mek Mala'n Mizo leilunga inhnek a chak tawh hle bawk.

Lightheavyweight huangah round li inhnek tura tih an ni a, kum 2022 National Games silver medal latu Mala chuan, "Johnkenty-a hi Mizoramah hneh loh nei lo ang a nih avangin a vawklallen riauin ka hria a; chuvangin ani nena inhnek hi ka duh a, a phurawm tawh hlein ka hria," a ti.

Electric Veng, Lunglei chhuarvawr Mala tan inhnek pawimawh leh Mizo mipui nawlpui hmuh theih tura a inlan vawi khatna a ni ve thung dawn a. Kum hnih kal ta khan National Games-ah Mizo boxer zinga che ṭha ber niin middleweight final a lut a ni.

Inhnek hi July 26 hian LPS Arena, Falkland Vengah neih a ni ang.