Champion tur a chiang lo - Quartararo

MotoGP championship hmahruaitu Fabio Quartararo chuan nomawi inchuh boruak a sang dawn thu a sawi a, midang tan pawh champion theihna kawng zau taka hawn mek a nih thu a sawi tel bawk.

Yamaha rider hian tun season intlansiak hmasa pahnihah hnehna a chang a, inelna hnuhnung pahnihah erawh a sang zual pathum zingah a tel phak lo. Point 67 hmu tawhin amah hnaih bertu Andrea Dovizioso chuan point 56 a nei thung.

Quartararo chuan, "Austria ramah beisei angin ka tlan ṭha lo, hun ṭha ka neih ka chhawr ṭangkai loh avangin rider dang tan pawh hmahruai theihna kawng chu zau takin a inhawng mek. Austrian Grand Prix tlan zawh taka ka tih fuh loh lai ka zirchiang a, tun kar tawpah chuan a fuh tawh ang," a ti.

Pathianni tlai dar 5:30 hian Austrian Grand Prix an tlanna, tlan kawng ngai tho Red Bull Ring-ah Styrian MotoGP an tlan dawn. French tlangval hian kar hmasa lama beisei a phak lohna hmunah tha thara inlan a tum. MotoGp champion lai Marc Marquez chu kumina inelna hmasa ber Spanish GP-ah a chetsual avangin a la inlan thei dawn lo. Spanish rider hi a ban ruh tliak zai niin dam leh vat tura ngaih ni mah se beisei angin a dam chak ta lo a, season kal laiah point a la nei ve lo.