Champion lai Chile tan chetsual a thiang lo
Copa America Centenario khelh mekah champion lai Chile chu group stage paltlang lo thei dinhmunah an ding mek. Nilaini zing dar 5:30-ah Panama nen an group match hnuhnung ber an khel dawn. Quarterfinal lut chiang tawh Argentina leh tla chiang tawh Bolivia te zing dar 7:30-ah an inhmachhawn bawk ang.
Nikum khan Chile hian Copa America hi an thleng a, an tual zawlah Argentina chu penalty shootout-a hnehin an champion. Copa America kum 100 tlin lawmna Centenario-ah erawh beisei an la phak lo. An match hmasa berah Argentina 2-1 in an hneh lo a, Bolivia lakah hun pek belh hmang
ṭangkaiin 2-1 in an chak hram thung. An khingpui tur Panama nen hian point thum an nei tawh a, quarterfinal lut thei an nih laiin thla thei ve ve an la ni bawk, an inhnehtawk a nih chuan Chile an tlang ang.
Chile midfieldew Arturo Vidal hian Bolivia an hneh ṭum-in goal hnih a khung a, an team innghahna tur a ni leh ang. Ani hian Bayern Munich tan season duhawm tak a hmang zo hlim a ni a, an team hi amahah an inghat thui hle. Alexis Sanchez hi tlarhma lama an hmachhuan ni mah se Arsenal forward hi a la khel ṭha tawk lo thung.
Messi hoin
Argentina match hnuhnung berah Lionel Messi a inlan thei tawh a, hnungzâng na vanga an match hmasa ber khel lo Barcelona star hi khelmual chhungah goal thum nen a lo kir. Tlarhma lama player ṭha rual awmkhawm zingah Serie A top scorer Gonzalo Higuain-a'n tun tournament-ah goal a la khung miah loh avangin Manchester City stri-ker Sergio Aguero-a'n inkhel bul a ṭan ve tawh mai thei. Angel Di Maria erawh malpui na vangain a inlan a beisei awm loh thung.
Ram pahnihte hi tun hmain vawi 14 an lo inhmachhawn tawh a, Argentina hi vawi kua chakin vawi li an inhnehtawk. Bolivia hian vawi khat hnehna an chang ve tawh. Argentina hian an intawn hnuhnung vawi thumah hnehna chang vekin goal 14 an khung a, goal khat chiah an chhuah bawk avangin chak zawk tura rinkai an ni.
Kum 27-a upa Messi chuan, "Khelmual chhungah a taka hun rei ve tak ka inlan loh avangin insiam remna tur ka la ngah a, goal khung nghal mah ila ka khelh ṭhat dan ber a la ni lo. Kumin chu kan champion kum a nih ve tawh ngei ka ring a, chumi tur chuan kan thawk rim," tiin a sawi.
Argentina hi football thiam ram tia sawi ṭhin niin player ṭha rual kawl khawm mah se major tournament-ah kum 23 chhung ngawt an hlawhtling tawh lo. Tunhnai FIFA World Cup leh Copa America-ah te final lut mah se a chak lo zawkah an
ṭang ve ve. Heng an final khelh pahnihah hian an winger Di Maria chu hliam vangin an chhawr thei lo ve ve a, kuminah Paris Saint Germain hmatawng a inhliam leh tawh, ani tel lo hian nomawi an chawi thei ang em tih a hriat thuai dawn.
Copa America Centenario-ah hian champion ngun ber Uruguay chu an tla fel tawh a, team hlauhawm tura ngaih Brazil chu nimin zing khan Peru hneh loin an tla tawh bawk.