Liverpool-in Zielinski an dawr

Liverpool-in Polish midfielder Piotr Zielinski chu maktaduai 9.5-in Serie A club Udinese aṭangin lakluh an tum.

Reds hian Inrinni khan Udinese hi official-in an dil a, German coach Jurgen Klopp chuan telephone-in kum 22-a upa midfielder hi Liverpool-ah hmun pawi-mawh a chan tur thu a hrilh niin sawi a awm bawk.

Zielinski hi Euro 2016 khel tur Poland squad zingah a tel a, Northern Ireland an hneh ṭumin a inlan lo. Professional career hi Udinese-ah kum 2012 khan a ṭan a, kum 2014 aṭanga tun season tawp thleng khan Empoli-ah loan hmanga kalin league-ah match 63 zet a khel a, goal nga a khung bawk.

Italian club ṭha Napoli chuan Zielinski laktumin an dawr ve bawk a, club president Aurelio De Laurentiis chuan, "Liver-pool-in an dawr a, amah pawhin zawm a duh. Mahse Udinese nen in-remna kan lo neih tawh avangin amah hi hmin kan tum," tiin a la beidawn loh thu a sawi.

Napoli dawrna zat hi pound maktaduai 8.7 bakah thil dang belh neuh neuh a tel a, Udinese chhiar zat erawh pound maktaduai 12 a ni thung.

Tuna Napoli coach Maurizio Sarri hian Em-poli a enkawl laiin Zielinski hi player ṭha zawkah a siam a, tunah chuan Polish midfielder ball pass thiam tak a ni tawh. German coach Klopp hian Polish midifielder hi a la lut thei a nih chuan nipui transfer-a a player pali lakna tur a ni ang.

Liverpool-in Serbian midfielder Marko Grujic, Cameroonian defender Joel Matip leh German goalkeeper Loris Karius te an la lut tawh a ni.