Hammer boss-in Payet a fak

Dimitri Payet-a'n European Championship 2016 hawnna inkhelah inelna thlengtu France chakna goal a khung a, West Ham manager Slaven Bilic-a'n a player chungchang hi sawi nuam a ti hle.

Croatian coach Bilic chuan, "France-in Romania an hmachhawn hma zan khan Dimitri Payet hi ka message a, chutah chuan 'Nuam ti takin khel la, i thiam zia lantir turin khelmual chhungah engmah tih i mamawh tawh lo. Tunah khan a ṭha ber i ni sa tawh' tiin ka ziak," tiin inkhelh hmaa a fuih thu a sawi.

France match hmasa berah Payet-a'n Olivier Giroud khung tur a siam sak bakah goal ropui a khung a, opening match bikah ani aia player ṭha an awm lo.

Kum 47-a upa Bilic chuan, "Ka sawi sual em? Chakna goal a khung avangin chauhin a ropui lo a, a pumpuia thlirin a khelṭha em em a ni. France khan Payet aṭang vekin ball an kaltir - vei lama a awmin vei lam aṭangin an nawr a, field laia a awmin a danglam chuang lo. French player tam zawk khan ball an chan apianga Dimitri lam an hawi kha a awihawm loh hial zawk. Tun hmain France team-ah player pawimawh a ni lo a, tunah chuan theihna a nei tih a lantir a ni. West Ham-ah season ṭha tak a hmang a, kan club player a nih avangin kan chhuang a, hun rei tak cham turin contract a ziak bawk," tiin season hman zawh taka Hammer player of the Year Payet a fak hle.

French midfielder a atchilhna a rei tawh thu sawiin Bilic chuan, "Besiktas ka enkawl lai khan Marseille aṭangin lakluh ka tum tawh a, amaherawhchu Turkish club-a tlem luh kha chu a harsa a ni. Khatih hunlai pawh khan player ṭha tak a ni tawh a, tuna a khelh
ṭhat avang hian club lian zawkin min chhuhsak ka hlau lo. Kei chuan a inkhel lai hi hmuhnawm ka ti a, cheṭha turin ka duhsak em em a ni," a ti.

West Ham-ah season khat chhung a enkawl tawh a, a khawsak danin Bilic a thinlung a hneh. Croatian manager chuan, "Kan club a rawn zawm hnuah a puitling sawt a, kei leh ka thawpuite chuan hmasawnna kawngah chuan pui ve bawk mah ila a thawhrim vang a ni. Club-a a khelhpuiten a danglam tih an hria a, mah se a inngaitlawm tlat a, midang nen inang khata enkawl a duh. Goal venhim kawngah chuan Mark Noble emaw Cheikhou Kouyate te tluk thei dawn lo tih inhre mah se goal venghim turin a theihna zawng zawng a chhuah ṭhin. Hei hi a ṭhiante pawhin an hre ve tlat a, Dimitri tan chuan a tlan tura aia tam an tlan phah ṭhin. Hetianga player-te an khawsak tawh chuan manager tan pawh hna a awlsam phah em em ṭhin a ni," tiin a sawi.

France-in Nilaini zan dar 12:30-ah Albania an hmachhawn dawn a, mipui mit fukna tur chu Payet a ni ang. Hemi hun hi West Ham midfielder tan a thiamzia lantir nawnna hun ṭha tak a ni dawn a ni.