Goal sawisel hlawh hmangin Brazil an tla

Peru striker Raul Ruidiaz-a'n Brazil goal-ah a kutin a beng lut a, referee-in he goal hi a pawm miau avangin champion beisei ngam Brazil chu Copa America group stage aṭangin an tla ta.

Group B inkhel dangah Ecuador chuan 4-0 in Haiti an sawp a, Peru nen quarterfinal khel turin an inpet tling.

Vanduai Brazil

Brazil-in Copa America-a an match hmasa berah Ecuador chu goal awm loin inhnehtawkpui mah se an match hnihnaah Haiti chu 7-1 in inkhelh an zirtir a, beiseina sang tak nen Peru an hmachhawn.

Nimin Group B inkhel hmasa zawkah Ecuador-in Haiti an sawp avangin group hmahruaitu Brazil leh pahnihna Peru inkhel hi quarterfinal lut tur zawnnaah ngaih a ni.

Brazil-in Ecuador aia goal difference an neih ṭhat zawk avangin Peru nen inhnehtawk pawh nise quarterfinal an lut thei - heti chung hian inkhelh ṭantirh aṭangin Brazil-in chak ngei tumin na takin an nawr.

Minute 24-naah Lucas Lima chu Christian Ramos-a'n penalty area-ah ti tluin penalty chawi ngei tura ngaih ni mah se referee-in Brazilian player-te ngaihdan a ṭawmpui lo. Minute thum hnuah Brazil bawkin hun ṭha an nei leh a, mah se mawi taka ball an inpek kual hnua Gabriel-a goal shot chu Peru keeper Pedro Gallese chuan a kut hmawrin a lo khawih per hman.

Brazil-in Willian leh Ga-briel hmangin hun ṭha nei leh mah se goal-ah an chantir thei lo a, hetihrual hian penalty area-a Peruvian striker Paolo Guerrero titlutu Renato Augus-to-a'n penalty a chawi lo chu a vannei hle.

Goal maksak

Minute 75-na a ni a, beisei loh zawk Peru-in goal an khung. Andy Polo ball cross chu Peruvian Messi tia hminglem an phuahsak Raul Ruidiaz chuan a kutin a lo hui lut a, dik taka goal khung ang maiin a lawm chiam.

Kum 25-a upa goal khung hi referee-in pawm zet mah se assistant referee-in a pawm loh avangin match official-te an inrawnkhawm. Minute li lai he goal vanga inkhel tih khawtlai a nih hnuah referee Andres Cunha-a'n Copa America chanchina hriat reng tawh tur thutlukna a siam a, Ruidiaz-a'n a kut hmanga a hui luh hi goal-ah a pawm sak.

Brazil player-ten lungawi lo chunga referee thutlukna an pawm a ngai a, an si phurh sut ngei tumin nawr mah se Peru tlarhnung an sut hawn zawh loh avangin group stage aṭangin Brazil an tla.

Dunga a lawm lo

Goal sawisel hlawh hmang-in Brazil hnawhchhuah an ni a, Brazil coach Dunga a lawm thei lo. Player a nih laia Brazil captain ṭhin chuan, "Mi zawng zawngin thil thleng kha an hmu vek a, an ngaihdan kan thlak sak thei lo. Referee leh a assistant-te khan minute li lai inrawnkhawm nan hun an hmang a, chuti chung chuan thutlukna dik an siam thei lo," tiin a lungawi lo hle.

Kum 52-a upa manager chuan sawi chhunzawmin, "Football vanga chak lo kan ni lo a, football dan piah lama ngaihdan hran neih vangin Copa America aṭanga hnawhchhuah kan ni," tiin referee thutluknaah a lungawi thei lo.

Duh thlang sual Dunga

Khawvela football thiam ram sawi a nihin Brazil sawi hmaih an ni ngai lo. Mahse, Brazil coach Dunga-a'n Copa America khel turin Brazil tana la inlan tam lo players a thlang hnem a, goal hmaah an tawnhriat ngah tawk lohna a lang chhuak.

Peru an hmachhawn ṭumin Dunga-a'n 4-2-3-1 formation a hmang a, inkhel bul ṭan zingah ram tana vawi 92 inlan tawh right-back Dani Alves chu tawnhriat ngah ber a ni. Goal ban kara ding Alisson Becker hian 2015 khan ram tan a khel ve ṭan chauh a, Brazil tana goal a ven tawh zat hi vawi riat a ni.

Defensive midfielder Rena-to Augusto hi Chinese Super League club Beijing Guoan tana khel a ni a, Brazil tan vawi 10 bak a la inlan lo. Tlarhma lama Philippe Coutinho leh Willian-te nena ding ho Lucas Lima hi Santos attacking midfielder niin Brazil tan vawi 11 chiah a la inlan a, season hman zawh takah Santos tan match 18 chiah khelin goal hnih a khung.

Tlarhmaa mal tlat Gabriel Barbosa hian kuminah ram tan a khel ṭan ve chauh a, Brazil tan vawi thum a inlanah goal hnih a khung - heng zingah hian Haiti laka goal khat a khung kha a tel.

Ecuador an tlang

An match hmasa bera Bra-zil an inhnehtawkpui hnu-ah Ecuador-in Peru an inhnehtawkpui leh a, beisei lawk ang ngeiin Haiti chu 4-0 in an sawp. Ecuador tan Enner Valencia (11'), Jaime Ayovi (20'), Christian Noboa (57'), Antonio Valencia (78')-ten goal khat ṭheuh an khung a, Haiti-in tih theih an nei tam lo.

Haiti tan hian Mohun Bagan winger Sony Norde chuan inkhel bul a ṭan a, Haiti-in group stage-a match thum an khelhah chak hmel hmu loin Copa America an mangṭha.

Copa America Centenario