UEFA-in England leh Russia vau

Euro 2016-a an match hmasa berah England leh Russia an inhmachhawn a, inkhelh zawhah team pahnih fan-te an insual buai avangin Europe-a football thuneitu sang ber UEFA chuan England leh Russia chu an fan-ten buaina an siam leh a nih chuan tournament aṭanga paih chhuah an nih tur thu an hriattir.

UEFA chuan buaina bul tumtu Russia fan-te avangin Russian Football Union (RFU) chu a chhui mek a, England erawh chhui ni ve loin warning pek hi duhtawk a ni. Russia hi mipui tibuai, vun rawng inthliarna hawi zawnga khawsa leh halmawi halah puh an ni a, vawiinah RFU hremna hi tihchhuah hman tum a ni.

Russia sports minister Vitaly Mutko chuan UEFA chuan RFU chhui tura thutlukna a siam chu thutlukna diktak a nih thu a sawi a, fans tam takin inkhel en tuma stadium an pan laia buaina siam an la awm ṭhin chu pawi a tih thu a sawi bawk.

UEFA chuan inkhelh ṭan hma pawn lama England leh Russia fans insual buai chungchangah erawh an thuneihna pawn lam a nih avangin hmalakna an neih loh thu an sawi.

Hetihlai hian United Kingdom sorkar chuan June 16-a Wales leh England an inhmachhawn hma ngeiin venhimna lam thawk tura British police thawn luh an duh thu France sorkar hnenah an hriattir tawh.