Euro 2016 Croatia chakna Modric goal ropui

Luka Modric goal ropui bik khung hmangin Pathianni zan khan Croatia chuan Euro 2016-a an match hmasa berah Turkey 1-0 in an hneh. Euro 2008 khan Turkey hian Croatia hi penalty shootout-a hnehin semifinal an lo inhlangkai tawh a, tunah erawh result a danglam ta.

Croatia hian European Cham-pionship vawi nga an khelh tawh aṭangin an match hmasa berah chak loh an la nei lo a, vawi li hnehna changin vawi khat an inhnehtawk. Turkey erawh European Championship vawi li (1996, 2000, 2008, 2016) an khelh tawh aṭangin an match hmasa berah la chak lo vek.

Parc des Princes, Paris-a inkhel-ah Croatia-in inkhel thu-nun mah se goal an khung mai thei bik lo. Turkey midfielder Selcuk Inan-a ball clear lo nang fuhtu Real Madrid midfielder Modric chuan metre 25 a hla aṭangin minute 41-naah ball kang lai chu a hlap kul lut zawt.

Khawvela midfielder hmuh-nawm berte zinga mi Modric bakah Barcelona pair Ivan Rakitic leh Arda Turan te khel-mual chhunga chungnung zawk nih inchuh lai a hmuhnawm a, Croatia veteran right back Darijo Srna chu an goal nawr sulsutu pawimawh niin an team attack 48.5% zet chu ama lam
aṭanga chhuak a ni.

Srna ang tho hian mual sir lehlamah Ivan Perisic a thawhrim hle bawk a, anni pahnih hian woodwork an tih per bakah Turkey keeper Volkan Babacan chuan an lama lut tur ṭum nga ngawt ṭha takin a dang.

Euro 2016 ṭan hma khan Croatia coach Ante Cacic chuan eng team pawh barakhaih thei tura an ṭhat tawk thu a lo sawi tawh a, a naute hrechiangtu Cacic hian a sawi sual lo tih khelmual chhungah kan hmu.

Turkey inngahna Turan khel chhe lo mah se a team chakpui tur khawpin a tal na tawk lo a, freekick specialist Hakan Calhanoglu a langsar tawk lo bawk. Kum 18 leh ni 323 chauha upa ni chungin Emre Mor chu minute 69-naah rawn tlan lut mah se Turkey tana major tournament khel thei naupang ber hian danglamna a thlen thei lo.

Kum 30-a upa Modric chuan, "Football ram ropuite khelh dan anga kan khelh avangin kan khelh danah kan lawm tlang hle. Goal khat aia tam khung thei tur chu kan ni a, mahse kan vanneih tawk loh bakah Turkey khan inthlahdah thei miah loin min siam. A tir chauh chu la ni mah se a bul kan ṭan dan hi a lawmawm hle," tiin a sawi.

Turkey boss Fatih Terim chuan, "Arda Turan leh Hakan Calhanoglu te hi kan team khai-khawmtu an ni a, kha aia ṭhaa khel chhuak thei tur kha an ni. Goal chhuah thei dinhmunah kan ding tih kha chu ka hre lawk a, mah se second half-a kan sut thei lo erawh a pawi," a ti.

Group D hi knockout round lut tur hriatthiam harsatna ber group pakhat a ni a, nizan khan Spain leh Czech Republic ten an match hmasa ber an khel ve bawk.