US Open khelh hi tennis tan a ṭha - Djokovic
Player langsar an inhnukdawk a, mipa leh hmeichhe singles champion lai meuh pawh an nomawi humhim turin an inlan dawn lo - Novak Djokovic erawhin ngaihdan dang a nei, tennis khawvel tan US Open khelh ngei chu a ṭha nia a hriat thu a sawi.
Mipa world number 1 Djokovic hi Western & Southern Open-ah a inlan dawn a, hard court inelna hi August 31 aṭanga khelh tur US Open inbuatsaihna a ni nghal ang; tournament pahnih hi Flushing Meadows, New York-ah entu awm loin an khel dawn.
Kum 33 mi Djokovic chuan, "Player langsar ka nih vangin he hmuna inkhelh hi ka mawhphurhnaah ka ngai, tennis hi tluang taka hmalam pana a kal zel theih nan tournament khelh hi a pawimawh," a ti. Champion lai Rafael Nadal erawhin Covid-19 a hluar avangin a inlan loh tur thu a sawi thung.
Grand Slam vawi 19 champion tawh Nadal a inlan dawn lo a, major title 20 nei tawh Roger Federer chu khup hliam vangin a inlan dawn lo bawk. Serbian tlangval hian nomawi lian tham 17 a nei tawh, a hnunga mite hnaih theihna hun ṭha a ni.
Australian Open champion lai Djokovic chuan, "Rafa leh Roger an inlan loh vanga inlan lui ka ni chuang lo, nomawi lian tham chawi tum erawh chu ka ni," tiin a sawi. World number 1 hian coronavirus a kai a, tunah erawh a dam chiang tawh thung.
Hripui leng vanga khawvel a inkharkhip lai khan Djokovic hian a ṭhiante nen Adria Tour an buatsaih a, he inelna aṭang hian hri an kai. Mi tam tak dem a hlawh viau, amah ngei pawhin hrehawm a tih thu leh thupha chawina a ti chhuak.
Djokovic chuan, "Midang rilru kan tih nat leh hliam an awm a, kan thil tih vanga buaina leh harsatna tawkte chungah ngaihdam ka dil nawn. Chutihrualin inelna kan buatsaihna hmunah khan dan bawhchhiat kan nei lo," a ti. Croatia leh Serbia kha ram dang angin an inkharkhip ve lem lo a ni.
Nadal leh Federer inlan dawn lo mah se Djokovic tan numsa taka champion ngawt theih a ni kher lo ang. Season hmasa finalist Daniil Medvedev, Dominic Thiem leh Alexander Zverev te an la awm dawn a, inelna hautak chu a nih ngei a rinawm tho.