Bale-a ṭawngkam ngaithei lotu Hodgson

June 16 zanah England leh Wales an inhmachhawn dawn a, British Derby hian khelh a nih hma hauhin thawm a nei lian hle. Wales thiampuipa Gareth Bale chuan, "Eng-land aiin chak duhna thinlung kan pu lian zawk a, kan inhmachhawn hunah hei hi lantir kan tum ang," tiin a sawi a, hei hian England manager Roy Hodgson a ti lawm lo.

Kum 68-a upa manager chuan, "Football-ah hian tupawhin ngaihdan an nei tih hre turin ka hun ka hmang tam tawk tawh. Hmanni lawkah Russia goalkeeper Igor Akinfeev-a'n champion tura rinkai zingah kan chhiat ber thu a sawi a, tunah Gareth Bale-a'n kan team chungchang a sawi ve leh ta. Players tupawhin an ngaihdan an sawi thiang a, mah se England kan hmangaihna leh ram tana kan inpeknaah hi chuan rinhlelh tur ka nei lo," tiin Bale-a thusawi a chhang let.

Liverpool manager hlui chuan sawi chhunzawmin, "Ka player-ten ram an hmangaihna chungchangah zawhna in nei a nih chuan Russia nena kan inkhel kha en let ula, kan theihtawp kan chhuah lo emaw ram kan hmangaih tawk lohna nia lang in hmuh chuan ka bulah lokal ula, min kawhhmuh rawh u," tiin ram tana a player-te an inpe tawk lo anga sawi awm chu a la na hle.