Everton coach thar Koeman

Premier League club vantlang Everton chuan manager thar an nei a, a hming chu Ronald Koeman niin kum khata pound maktaduai ruk hlawh turin season thum chhung atan inremna an ziak.

Toffees hian Roberto Martinez an ban hnuah manager thar an zawng reng a, kum hnih chhung Southampton lo en-kawl tawhtu Koeman chu an mi zawn chu a ni. Saints manager ṭanglai an chhuhsak avangin Everton hian an elpui club hnenah hian zângnadawmna pound maktaduai nga an pek a ngai dawn a ni.

Everton neitu thar Farhad Moshiri leh Netherlands international hlui Koeman te hi kartir lam khan inbe fel tawh a sawi a ni a, La Liga club Valencia pawh lo enkawl tawhtu hi chawlh hmanga a chhuah avangin an inremna puan zar hun hi a tlai hret phah.

Kum 53-a upa Koeman kaihhruaina hnuaiah Southampton hi tun hnai season hnih chhungin Premier League-ah pasarihna leh parukna an ni a, league bikah hian 47% chak percentage neiin an club chanchina an chet ṭhat ber ṭum a ni.

Everton chairman Bill Kenwright chuan, "Koeman hian player a ni lai leh coach a nih hnuah sulhnu ropui tak tak a lo nei tawh a, player-te zah a nih bakah amahah hian hlawhltin duhna a awm. Manager kan melh kual zinga kan duh ber kan lalut thei hi a lawmawm hle," tiin a sawi.

Player a nih laiin midfield leh de^-fence-ah a khel ṭhin a, match 750 a khelh aṭangin goal 253 a khung. 1988 European Championship champion Netherlands team-ah khan a tel nghe nghe. European Cup - tuna Champions League ni taah hian PSV Eindhoven (1988) leh Barcelona (1992) tana a khelh laiin a lo champion tawh bawk.

Team enkawl lamah pawh tawnhriat a ngah tawh hle a, Vitesse Arnhem, Ajax, Benfica, PSV, Valencia, AZ Alkmaar leh Feyenoord te enkawl tawhin Ajax leh PSV te hi Dutch league-ah a champion pui a, Valencia chu Spanish Cup a chawi pui bawk.