Sweden leh Ibra te an vannei

Republic of Ireland-in Euro 2016 match hmasa berah ṭha takin khel mah se Ciaran Clark-a'n an lama a tih goal avangin Sweden nen point khat an insem.

Thawhṭanni zan Group E inkhel pakhat zawkah Sweden leh Republic of Ireland te 1-1 in an inhnehtawk. Minute 48-naa Norwich midfielder Wes Hoolahan khung chu minute 71-naa Aston Villa defender Clark-a chetsual vangin a hlut tur angin a hlu ta lo.

Ireland boss Martin O'Neill-a hoten inkhel an thunun a, mual vei lamah Robbie Brady chu Sweden tlarhnung tan ahnawksak a, Jeff Hendrick ball pet chuan crossbar a per bawk.

First half-a goal a luh loh hnuin minute 48-naah Everton wing back Seamus Coleman-a'n dinglamah Sweden tlarhnung a chaih phar a, a ball cross ṭha zet chu Hoolahan-a'n a volley goal nalh hle.

Sweden captain Zla--tan Ibrahimovic chuan inkhelh hmain a hlauh-awm reng thu a sawi a, hun tam zawk reh mah se an siphurh an sutna kawngah a pawimawh hle. Manchester United nena sawi zawm striker ball cross chu minute 71-naah Clark-a'n an lamah a tauh lut.

Republic of Ireland manager Martin O'Neill chuan, "Kan khel a hmuh-nawmin ka hria a, ropui takin football kan khel a ni. Goal kan chhuah dan kha pawi kan ti a, dressing room-ah pawh player an ngui. Amaherawhchu kan khelh dan en khan lungngai tur kan ni lo a, kan lawm zawk tur a ni," tiin an phu tawk result an hlawhchhuah loh thu a sawi.

Robbie Keane chu hun tawp lamah Ireland tan a rawn tlan lut a, kum 35 leh thla 11-a upa striker hi Ireland ram tana Euro khel thei upa ber a ni.