Team tlo Italy-in Belgium an hneh

Italy rama league sang ber Serie A tlak hniam lai a ni a, an ram team pawh an ṭhat lai ber a ni lo. Chutichung chuan Antonio Conte hoten Europe ram zinga ṭhangduang ber Belgium an hmachhawn a, Emanuele Giaccherini leh Graziano Pelle te goal hmangin khawvel an barakhaih a, 2-0 in an chak.

Record thar

Ram pahnihin Euro 2016 ṭan hmain player ṭha an chan ve ve. Belgium-in defender pahnih Vincent Kompany leh Nicolas Lombaerts te hliam vangin an chhawr thei lo a, Italy lam pawhin inhliam vangin midfielder ṭha pahnih Claudio Marchisio leh Marco Verratti te an chan ve bawk.

Season thara Chelsea enkawl tur Conte-a'n starting eleven-ah European Championship history-a player upa ber a luhtir a, Italy tana bul ṭantute kum chawh-rual hi kum 31 leh ni 169 a ni.

Goal venhim

Italy boss Antonio Conte-a'n ngaihdan nghet a nei a, goal khung vak aiin goal chhuah tlem zawk nih a ngai pawimawh.

Azzurri keeper Gianluigi Buffon-a'n minute 10-na lekah Radja Nainggolan ball pet kawh tak chu a dang a, Roma midfielder hian chance dang nei lehin goal zawnah a pet lo.

Minute 32-naah halfway line aṭanga Leo Bonucci ball vawrh chu Giaccherini-a'n dam dapin a ke vei lamin a la thla a, Thibaut Courtois inrawlh hmain a ke dinglamin a khung. Belgium tlarhnung a pawp a, Italian attacking midfielder finishing a ṭha thung.

Hemi hnu hian Lazio mid-fielder Antonio Candreva-a ball pet kawh tak chu Courtois-a'n a dan sak a, Pelle-a'n tibuaitu nei lo chungin goal zawnah a tauh thei lo. Tlarhnung rem phui thiam Italy goal nawr a na tho.

Second half-ah Red Devils an hlauhawm nghal a, Romelu Lukaku chuan a chance ṭha neih chu Buffon tlan chhuah ṭhat vang leh finishing ṭhat tawk loh vangin goal chungah chiah a kal.

Goal beiseiin Marc Wil-mots-a'n Dries Mertens leh Divock Origi te a luhtir a, Liver-pool forward hian yard sarih lek aṭangin a tauh goal lo. Italy innghahna chu counter attack a ni a, substitute Ciro Immobile ball pet chu Courtois-a'n a dang ṭha hle.

Belgium lamin ball vawrh nasa mah se Marouane Fellaini leh Origi te goal hmaah an hriam lo. Injury time-ah Azzuri-in an vaw let a, minute 93-naah Antonio Candreva chip cross
ṭha zet chu Southampton striker Pelle-a'n chiang zetin a volley lut.

Ngaihdan an sawi

Italy coach Antonio Conte chuan, "Mi puitling rual awm khawm kan ni a, inelna lianah chuan inlungrual taka khelh hi a pawimawh a ni. Inkhelh zawha team pumpui kan lawm dan khan kan rilru puthmang a tilang a ni. Kan tum chu last 16 thlen a ni phawt a, chumi zawh chuan kan en leta kan inchhir theihna tur ang neih loh a ni a, kan phu tawk ang chu kan thleng ang," tiin a ṭawng pawr ṭha duh lo.

Belgium coach Marc Wil-mots chuan, "Mimal tihsual vanga chak lo kan ni a, Lukaku leh De Bruyne te pawh kha aia khel ṭha thei an ni. Tunah erawh chuan last 16 thlen dan tur kan ngaihtuah a
ṭul a, match hnih khelh hmabak
aṭangin result ṭha kan hlawh-chhuah a ṭul a ni," tiin an ṭhat dan ber a la nih loh thu a sawi.