Copa America Centenario Inhnehtawk Mexico leh Venezuela an tlang

Thawhlehni zing khan Copa America Centenario Group C league round khelh zawh a ni a, Mexico leh Venezuela te 1-1 a inhnehtawkin ram pahnih hian quarterfinal an lut a, inkhel awmze nei tawh loah Uruguay chuan Jamaica 3-0 in an sawp bawk.

NRG Stadium-a inkhelah Venezuela tan Jose Velazquez chuan inkhel ṭan aṭanga minute 10-na lekah goal hmahruai a khung a, he goal hi an chak pui mai dawnin a lang hman. Mahse, substitute Jesus Corona chuan minute 80-naah an siphurh sutin point khat hlu tak a hlawhchhuah pui.

Mexico hi chak zo lo mah se knockout round an lut chiang tho a, mahse an group-ah hian pahnihna an nih chuan quarter final-ah Group D-a pakhatna an hmachhawn a ngai dawn. Argentina hi hmahruaitu an ni ngei dawnin a lang tawh a, Lionel Messi leh a hote hmachawn nghal ai chuan Chile leh Panama inkhela chak zawk zawk hmachhawn a thlanawm ngeiin a rinawm.

Mexico coach Juan Car-los Osorio-a'n player ṭha hahchawlh tir hun a ni tih hriain Jamaica 2-0 a an hneh ṭuma a player pakua ngawt a siksawi a, hnehna chang zo chiah lo mah se a zawnin match 22 chhung zet hneh loh nei loin an kaltluang ta a, match 11 chhung hnehna an chan tluan tawh erawh a tawp rih ta a ni.

Eng nge an sawi?

Venezuela coach Rafael Dudamel chuan, "Inkhelh zawh khan ka player-te kha an thimrim hle, a chhan chu hnehna chan an duh lutuk vang a ni. An rilru put hmang a dik avang khan ka lawm hle a, chak phu khawpin kan khel ṭha chunga hun tawp dawna goal kan chhuah kha a uiawm hle. Team ṭha leh hmasawn kan nih zia kan pholan theih zel avangin ka lawm," tiin a nauteah beiseina a nei sang hle.

Mexico coach Osorio chuan, "Vawiina kan tih fuh loh awmchhun chu an tlarhnung kan su pawp lawk thei lo kha a ni a, a bak zawngah kha chuan kan khel chhe hran lo. Kan goal chhuah kha set piece aṭangin a ni a, invendan kan zir nawn leh ang," tiin a sawi. Mexico hian tun hnai an game hnuhnung 10-ah goal nga chiah an chhuah a, heng zinga pahnihte chu set piece aṭanga lut ve ve a ni thung.

Mangṭha Uruguay

Copa America Centenario khelh ṭan a nih dawn khan he inelnaa champion hnem ber tawh Uruguay hi champion tura rikai zingah an tel phak a, mahse vawi 15 champion tawh ram hian league round an paltlang zo lo.

Nimin zing khan Uruguay hian Abel Hernandez leh substitute Mathias Corujo goal khung bakah Je-Vaughn Watson-a own goal hmangin Jamaica 3-0 in sawp mah se awmzia a nei tawh lo.

Striker Luis Suarez chu an match hmasa bera Mexico 3-1 a an hneh loh ṭumin hliam vangin an chhawr thei lo a, Venezuela 1-0 a an hneh loh ṭumin Barcelona hmatawng hi bench-ah ṭhut tir ni mah se khelmualah a tlan lut lo. An match hnuhnung ber an khelh hian Suarez chu squad-ah telh a ni tawh lo.