Reds defender hlui Riise a chawl

Liverpool tan pawh-a lo khel tawh ṭhin Norwegian defender John Arne Riise chuan football a chawlhsan thu a puang a, kum 35-a upa defender hian an ram club Aalesund-a a contract neihlai chu a titawp a ni.

Kum 2005-a Liver-pool-in Champions League nomawi an chawi ṭuma an player pawi-mawh zinga mi Riise chuan, "Ka lo tum ber ṭhin chu kum 40-a upa ka nih thlenga Norwegian club tana khelh a ni. Mahse, ka duhthusam hi a thleng dawn ta lo. Ka taksa, ka rilru leh ngaihtuahna hi kum 20 chuang rim takin a lo thawk tawh a ni," tiin inkhelh zel chu tlin loa a inrhiat thu a sawi.

Norway tan vawi 110 inlana ram tana khel hnem ber dinhmun luahtu Riise chuan, "Football mangṭha a ngai ta mai hi a lungchhiatthlak a, lung a zing a, lunglennain ka khat a ni," tiin inkhelh chawlhsan a ngai ta mai chu lunglenthlak a ti hle.

Liverpool-a Riise khelhpui ṭhin Steven Gerrard chuan Norwegian defender nena an thlalak instagram-ah pholangin, "Career ropui tak i hman avangin 'Ginge' ka lawm-pui che a, hma hun duh-awm tak i neih ka duhsak che. LFC-ah kum tam tak chhung chu left back ṭha ber leh goal shot na ber dawttu i lo nih tawh ṭhin kha," tiin a ṭhianpa hi fiamthu nen a thlah a, Reds captain hlui hian pet na ber sawi lang lo mah se pet na ber chu amah ni ngeiin a lang.

Riise hian kum 1996 khan an ram club Aalesund aṭangin a professional career a ṭan a, kum 1998 khan Monaco zawm lehin French club-ah hian kum thum hun a hmang. Kum 2001 khan Liverpool zawmin Anfield-a kum sarih hun a hman chhungin FA Cup (1), League Cup (1), FA Community Shield (2), Champions League (1) leh UEFA Super Cup (2) nomawi a chawi.

Liverpool a chhuahsan hnuah Serie A club AS Roma-ah kum thum hun a hmang a, kum 2011 khan Premier League-ah kir lehin Fulham a zawm. Kum 2014-a Fulham a chhuahsan hnuah Cypriot club APOEL chu kum khat chhung atan a zawm a, nikum khan Indian Super League club Delhi Dynamos tan a khel. March-ah khan a chawr chhuahna club Aalesund a zawm a, mah se a contract zawh hmain chawlh a thlang ta zawk a ni.