Euro 2016 Tlarhma bil Spain chhantu Pique

Spain-in European Cham-pionship-a an match hmasa berah Czech Republic chu Thawhṭanni zan khan minute 87-naa Gerard Pique goal hmangin an hneh hram.

Toulouse-a inkhelah Spain tlarhmaah Juventus striker Alvaro Morata chu Nolito leh David Silva ten an karcheh a, an hnungah Andres Iniesta, Cesc Fabregas leh Sergio Busquets ten an thlawp bawk. Goal a luh theih lawk loh avangin Vicente Del Bosque-a'n Aritz Aduriz, Thiago Alcantara leh Pedro Rodriguez te luhtir mah se a tawpa champion lai chhantu chu Barcelona defender Pique a ni. Catalan defender Pique hian Barca captain Iniesta ball vawrh ṭha tak chu a tauh lut a, Czech keeper Petr Cech pawhin a en liam ringawt.

Squad ṭha ber?

Spain manager Vicente del Bosque hi kum 65-a upa a ni tawh a, Real Madrid a enkawl hnuah La Liga leh UEFA Champions League-ah te a champion tawh a, an ram team a enkawl hnuah FIFA World Cup leh UEFA European Championship-ah te nomawi a chawi tawh. Record aṭanga thlirin Spanish pachal aia tawnhriat nei ṭha an awm bik lo a, player thlan kawngah pawh ani aia thiam tur chuang an awm lo.

Amaherawhchu Spain-in Czech Republic an hneh ṭum hian an ball possession neih zat chu 72% a ni pha daih a, ball pawh vawi 694 an in pass laiin an khingpui Czech chuan vawi 240 chiah an in pass. Hei chauh hi a la ni lo, Spain hian goal khung tumin vawi 17 zet an pet a, Czech aiin vawi 10 zetin goal attempt an ngah zawk. Amaherawhchu Spain hian goal zawnah vawi nga chiah an pet a, Czech aia an pet tamna chu vawi hnih chauh a ni.

France rama zin turin stage sanga khel tawh Diego Costa, Fernando Torres leh Juan Mata te an hruai lo a, match hmasa ber aṭanga thlir chuan an koh lo player-te hi mamawh lo zawk zawk chu an ni lo.

Dawhtheihna

Spain-in rinlawk ang ngeiin ball an inpe kual a, goal venhim tum tawpa inkhel Czech Republic tlarhnung patlang zeuh zeuh mah se Arsenal keeper Petr Cech an su tlang thei lo.

Morata-a'n yard ruk lek a-ṭangin a khung lo a, Cech-a'n Juventus forward pet hi a dang ṭha hle. First half-ah Spain-in goal chance ngah mah se goal khung ngei theihna tur chu Morata chance bak hi an nei bik lo.

Second half-ah Spain bawk an chungnung a, ram tana vawi 100 a khelhnaah Silva-a'n pass
ṭha nei mah se tlarhma dangte ang thoin goal hmaah a hriam bik lo.

Champion lai hian goal an khung thei lo chung pawhin ball an inpe kual reng a, an khelh dan ngai rengin an khel. Hun tawp lamah player danglam bik Iniesta ball fing tak chu Pique-a'n a tauh goal.

Czech lam hian sutna hun ṭha an nei a, amaherawhchu Her-tha Berlin midfielder Vla-dimír Darida ball pet chu David de Gea-a'n a dan sak. Spain boss Del Bosque-a'n goal veng turin chuai lam pan tawh Iker Casillas aiah Manchester United keeper De Gea a thlang a, a tifuh hle.

Eng nge an sawi?

Spain boss Vicente del Bos-que chuan, "A pawimawh hmasa ber chu point thum hmuh a ni a, a dawt lehah chuan player rilru puthmang a ni. Chak duhna thinlung an nei kha kan chakna chhan chu a ni. Chance ṭhahnem tak kan insiam a, kan match hmabakah tlarhma lamah harsatna kan neih loh ngei ka beisei," tiin an khelh dana a lungawi thu a sawi.

Goalkeeper chungchang sawiin Del Bosque chuan, "Bench lamah Iker Casillas a ṭangkai a, engtik lai pawhin team a ṭanpui ṭha hle. Tun hi kan inkhelh leh huna khel tur sawina hun a ni lo, football-ah chuan thianghlim taka inhnial chu a thiang a ni," tiin Turkey an hmachhawn huna keeper tur a sawi duh lo.

Czech Republic coach Pavel Vrba chuan, "Spain an khelṭha chungchuang a, Petr Cech khel ṭha hle lo phei se chuan result dang daih kan hmu ang. Player-ten an theihna zawng zawng an chhuah avangin an khelh danah ka lawm a, chutihrualin vawi thum goal khung theihna tur kan neih kan khung lo erawh pawi ka ti hle," tiin an hneh lo zawk tih a pha lo.

Czech Republic goalkeeper Petr Cech chuan, "Minute thum chiah a awm tawh tiha chak loh chu a hrehawm takzet a ni. Team pahnih kan inthlau lutuk a, chuvangin a tawpah chuan goal an khung ta nge nge a ni," tiin a sawi.

Zirtawpni zanah Group D ram pali te an inlan dawn a, zan dar 9:30-ah Czech Republic leh Croatia an inkhel ang a, darkar thum hnuah Spain leh Turkey te an inkhel leh ang.