Juve-ah Pjanic a chiang ta

Juventus chuan Mira-lem Pjanic chu kum nga chhung atan contract an ziah fel pui ta a, Serie A midfielder man hi pound maktaduai 25.4 nia sawi a ni.

Kum 2011 nipui lai khan French Ligue 1 club Lyon aṭangin Bosnia-Herzegovina international hian Roma hi a zawm a, kum nga a cham chhungin player pawimawh a ni.

Season liam ta khan Rome club tan hian league match 33 khelin goal 10 a khung a, Serie A table-a pathumna an nih theih nana thawh hlawk berte zinga mi niin Manchester United leh Chelsea pawhin an ngaihven nia sawi a ni.

Kum 26-a upa Pjanic chuan, "Juventus Stadium hi mikhual tana inkhelh harsatna hmun a ni a, tunah chuan helai hmuna Juve kawr ha lama ka ṭang ve tawh tur hi ka lawm. Goal tam zawk ka khung theih ka beisei a, fan-te lawmna thlentu nih ngei ka tum ang," tiin a sawi.

Italian champion Juventus hian Barcelona aṭangin defender Dani Alves an lakluh dawn bakah Patrice Evra chu kum khat dang atan con-tract an ziah thar pui tawh bawk. Mahse, an midfielder rinrawl Paul Pogba hi club lian dangte chil ti puttu a ni mek. Pogba hi a chhuak a nih chuan Pjanic lakah mawh-phurhna a innghat sang hle ang.

France international Pogba hi tunah chuan an ramah Euro 2016 khelin a awm mek a, La Liga champion Barcelona leh Champions League nomawi kawltu Real Madrid te bakah Jose Mourinho hnuaia indin thar tum Manchester United ten lakluh an duh niin thuthang a leng mek.