Mercedes Cup champion Thiem

Roger Federer hnehtu Dominic Thiem chuan Mer-cedes Cup final-ah Philipp Kohlschreiber lakah darkar hnih leh minute 11 chhungin 6-7, 6-4, 6-4 in hnehna a chang zui leh a, ATP World Tour champion nomawi a chawi.

Tennis inelna Mercedes Cup final hi Pathianni zan khan Stuttgart-ah khelh a ni a, German tlangval Kohlschreiber hian set khatna tie break-ah 6-6 (3/2) a hmahruaitu a nih laiin ruah sur vangin inkhel tih tawp a ni. Thawhṭanni khan khelh chhunzawm leh niin Thiem hian set hnuhnung pahnih a la ta zawk a ni.

Kum 22-a upa Thiem chuan, "Tun hnai kum hnih chhungin grass court-ah ka khel ṭha tawk lo a, Germany-ah pawh hian a tirah kha chuan beiseina ka nei sang lem lo. Ka champion thei hi ka lawm a, ka tan chuan a lawmawm dan a danglam hle a ni," tiin grass court-a a champion hmasak ber chu a danglam thu a sawi.

A champion vang hian Thiem hian €107,900 (Rs 81,78,456.81) leh Benz SL 500 car bakah Emirates ATP Rankings point 250 a hmuh belh a ni. Austria tlang-val Thiem hi kuminah Buenos Aires (clay court) leh Acapulco (hard court)-ah te a lo champion tawh bawk avangin tun dinhmuna tennis khel lai zingah court hrang hrang pathuma kum khata champion kim thei pakuana a ni chiah a, kum 1969 May (Open Era) chinah chuan player 29-na a ni.