NBA Finals Warriors chelh dingtu LeBron James

Thawhlehni zing khan Oracle Arena, Oakland-ah 2016 NBA champion hmuh tumin mipui 20,000 dawn an pungkhawm a, mah se LeBron James leh Kyrie Irving te chuan Golden State Warriors chelh dingin Cleveland Cavaliers chu 112-97 in hnehna an chan pui a, champion beiseina an nei ve leh ta.

NBA Finals Game 5 inkhelah James leh Irving te hian point 41 ve ve an score a, NBA Finals chanchinah game khata team khat aṭanga player pahnih point 40 chuang score tling dun thei hmasa ber an ni. American power forward James hian rebound vawi 16 a lak bakah assists vawi sarih a nei tel bawk.

Champion lai GSW tan an nomawi humhim turin vawi khat chak bak an ngai tawh lo a, Cavs tan erawh chetsual a thiang tawh miah lo thung. Game 5-ah hian team pahnih an inbei tawk hle a, half time-ah 61-61 a ni.

Third quarter an ṭan deuh chauh tihah Warriors center Andrew Bogut chu khup na vangin lakchhuah angai a, power forward Draymond Green hrem vanga an chhawr theih loh sa bawk avangin Steve Kerr-a naute an talbuai chhunzawm a, vawi 20 an theh aṭanga ṭum 14 zet an hlah zui hial.

Golden State tan shooting guard Klay Thompson chuan thawh hlawk berin point 37 a score a, quarter hmasa bera point 10 score-tu NBA Most Valuable Player Stephen Curry chuan inkhel pumpuiah point 25 a score bawk. Mahse, Game 4 an khelh ṭuma James laka a chet mawi loh vanga hrem tuar Green a awm loh an tuar tih a chiang.

Final inkhel panga an hmachhawn tawh aṭangin Golden State hian 3-2 in hma an la hruai a, Zirtawpni zing dar 6:30 hian Cleveland khelmual Quicken Loans Arena-ah Game 6 an khel ang. Cavs hian hnehna an chang ve leh a nih chuan Thawhṭanni zing dar 5:30 hian GSW khelmual Oracle Arena-ah engkim chinfel a ni ang.

A zawna NBA Finals kum ruk chhung khel thei James chuan, "Kan him leh ta phawt a, a tawp thleng tur chuan vawi khat dang kan chak leh phawt a ngai. Naktuk
aṭangin Game 6 khel turin kan inpuahchah nghal ang a, a tawp thlengin kan beidawng lo ang," tiin a sawi.

NBA Finals chanchinah eng team mah 3-1 a an hniam zawk tawh hnuin hnehna changtu zawkah an la ṭang let leh ngai lo a, Cavs hian 3-2 a an hnaih theih tak avang hian NBA history thar an ziak a nih pawhin a mak lo ang.

Warriors coach Kerr chuan, "Kan khelh ṭhat ber ni a ni lo a, hun pawimawhah kan chesual ngun em em. Kha aia khel ṭha thei tur kan nih laiin kan defending ṭhat loh kha kan tuar hle a ni," tiin vawi 17 ngawt turnover an neih chu an chak lohna chhan pakhat a nih thu a sawi.

Kum 31-a upa James hian NBA playoff bikah hian point 5463 a score tling ta chiah a, Kobe Bryant (5640), Kareem Abdul-Jabbar (5762) leh Michael Jordan (5987) te chiah tluk loh a nei tawh. Hetih lai hian kum 28-a upa Curry chuan point 1416 a nei ve tawh thung.