Football ram ropui Spain leh France an intawng dawn ta

Euro 2024 pawh a hmawr bawk a hnai ta a, zaninah semifinal match hmasa zawk khelh a ni dawn - tun inelnaa team hmuhnawm ber pawl Spain leh beisei phak lo France te zanin dar 12:30 hian an intawng ang.

Spain hian tun inelnaa match nga an khelh tawhah hnehna an chang vek a, an team hneh zingah Croatia, Italy leh inelna thlengtu Germany an tel avangin an ṭha tawk tih a chiang a, champion tura rin hlawh ber an ni mek.

France hian tun inelnaah minute 90 chhunga chak vawi hnih chiah an nei a, an squad neih chhah ngaihtuahin beisei an la phak lo. Group Stage-ah Austria chiah hneh mah se, Netherlands leh Poland inhnehtawkpui zuiin, semifinal hi an lut.

Mahse, Les Bleus dah hniam a thiang lo - knockout match hnih an khelh tawhah Belgium leh Portugal an hneh a, an khel ṭha lo chungin a thiam pali zingah an tel thei. Zaninah Spain tan zuam ngawt chi an ni lo ang.

Spain an kim lo!

Euro 2024-a match hmuhnawm bera chhal ngamah Spain-in 2-1 in Germany an hneh a, minute 120 ngawt an inkhel - hei chauh a ni lo. He inkhel avang hian Spain-in an player langsar an chân nual a, zaninah a kimin an inlan thei dawn lo.

La Roja tana inlan thei lo uiawm bera chhal ngam chu Dani Carvajal a ni. Real Madrid defender hi Spain tana a ṭangkaizia chu an inkhel entuten an hria - tlarhnung a veng a ni satliah lo a, goal nawr kawngah pawh player thawhhlawk a ni.

Mahse, Germany lakah red card a hmu a, zanin a inlan thei dawn lo. Kum 38 mi Jesus Navas chu Carvajal aia lut tura beisei a ni a, Sevilla defender hi a tha a ṭhum ve deuh tawh a, Kylian Mbappe nen an inhmachhawn dawn avangin La Roja tan a theihna zawng zawnga a khelh chhuah a ṭul.

France-a piang defender Robin Le Normand pawh hrem vangin a inlan thei dawn lo a, hliam vangin Pedri-a'n khelmual a lut thei lo bawk ang. Le Normand aia lut turin Nacho Fernandez a awm a, season hman zawh taka Real Madrid captain hi mi tam tak chuan Real Sociedad defender Le Normand ai hian an thlang zawk hial ang.

Engtin nge?

Spain tan Pedri awm lo mah se Dani Olmo a awm - RB Leipzig midfielder hian goal a khung bakah assist a nei tel a, a nung ṭha vet vet hle. Olmo hi midfield-ah Spain game khaidingtu Rodri leh player thiam bik Fabian Ruiz te nen an din ho a rinawm.

Unai Simon chu chuh rual loa si ban nghak leh tur a ni dawn a, tlarhnung laiah Nacho leh Aymeric Laporte inkawpin, Navas leh tournament duhawm tak hmangtu Marc Cucurella-ten mual sir lam an luah thei ang.

Spain game tihmuhnawmtu chu kum 21 mi Nico Williams leh kum 16 mi Lamine Yamal te an ni a, an che vel a hmuhnawm ṭhin hle. Spain boss Luis de la Fuente-a'n player pahnih hi thiam takin a enkawl a, venhim an la ngai tel tih hriain, Georgia lakah tih lohah kha chuan player pahnih hi a la khelh tluan tir miah lo.

Hetihrual hian Germany nen an inkhelh ṭuma yellow card hmu anga tarlan captain Alvaro Morata chu hrem a ni lo a, tihsual palh a ni - Atletico Madrid striker hi Yamal leh Nico te nen an inkawp leh dawn a ni a, tlarhnung khawng France-in engtia ven nge an tum tih hi hmuh châkawm lai chu a ni.

Beisei phak lo

France squad en vang vang ila, champion tur khawpin an ṭha tawk - champion phu khelh erawhin an la khel lo a, Spain hneh tur chuan vanneih ringawt a tawk zo lo ang. Les Bleus superstar rualten an theihna an pholan a hun.

Didier Deschamps-a mang tiangtu langsar nia rin theih chu Kylian Mbappe-a'n beisei a phak lo hi a ni a, kum 25 mi striker hian hmaikawr vuah chunga inkhelh chu harsa a tih chhunzawm zel - zaninah erawh striker class sang a ni tih a pholan a ṭul.

Mbappe hian tun hnaiah a ṭhianpa Paul Pogba awm lo chu an tawrh thu a sawi a, "Pogba awm lai kha chuan ka duhdanin khawiah pawh tlan ila, ka ke bulah ball a rawn dah dawn tih ka hre thei a ni," a ti a, France tana a khelhpui midfielder-te tan hriat a nuam lo ang.

France tana pawi pakhat chu Antoine Griezmann-a beisei phak lo hi a ni bawk. Deschamps-a'n duhsak takin, Atletico Madrid forward hi a khelh ṭhat theih nan a formation thlak danglamin, a khelh dan hial han siksawi ṭhin mah se, Griezmann a la che fuh thei tlat lo.

Duhthlanna

Deschamps-a'n thutlukna hautak a siam a ṭul a, French chanchinbu lar L’Equipe chuan Griezmann hi Spain lakah bench-ah a awm dawn niin an tarlang - tun inelnaah beisei a phak lo a, ram tana a match hnuhnung 33-ah goal hnih chiah a khung bawk!

Hei mai a ni lo. Spain lakah Les Bleus tan counter-attacking football khelh a fuh zawk a rinawm a, Deschamps-a rilru puthmang pawh a ni ang - chuti a nih chuan France-in tlarhmaah player tlan chak an mamawh a, kum 33 mi Griezmann hahdamtir a awm hle.

Mahse, ni e, mahse tih a ngai tho - France hi a hnung lamah an bet dawn a nih chuan Deschamps-a duh ber chu 4-2-3-1 a ni a, Mbappe hnung chiah, a laia ding tur chuan Griezmann aia thlan tur chu an awm si lo!

4-2-3-1 hi hman a nih chuan Marcus Thuram chu bench-ah awmin, a hma berah Mbappe a awm ang a, a laiah Griezmann dingin Portugal laka khel ṭha Ousmane Dembele leh Randal Kolo Muani te tlan chakna chu an chhawr thei ang.

Tlarhnung ṭha

France-in tlarhmaah pawh khawvel huapa player langsar an kawl chungin, tun inelnaa an lar pui ber chu tlarhnung an ni - goal khat chiah an la chhuah a, an goal chhuah pawh hi penalty aṭangin a ni.

Hei vang tak hian goal nawr na Spain nena an intawng tur hi en a châkawm. A bik takin William Saliba chu France tlarhnung tan innghahna tlak a tling a, tlarhnung laiah Dayot Upamecano nen inkawpin, mual sirah Jules Kounde leh Theo Hernandez te an awm ang.

Midfield-ah hrem vanga semifinal a khelh loh hnuin Adrien Rabiot chu lo kir leh tura beisei a ni a, tun tournament-a a theihna sanzia rawn pholang lehtu N'Golo Kanté nen inkawpin, Spain midfield che mawi tur dan chah an tum dawn.

Chuti a nih chuan Portugal lakah khel ṭha mah se, Eduardo Camavinga tan bench lam melh mai a finthlakin a rinawm. Deschamps-a'n Portugal anga 4-3-1-2 a hmang a nih chuan Dembele chu bench lamah kirin midfield thuam mawi turin Aurelien Tchouameni a lut thei ang.