Argentina hmaah Canada
Lionel Messi awmna Argentina chuan Nilaini zing dar 5:30 hian Copa America semifinal an khel dawn, group stage lama an hmachhawn tawh Canada nen final luh an inchuh ang.
Champion lai Argentina hi nomawi humhim leh tura rinkai an ni a, chutihrualin knockout tournament a nih tawh hi chuan beisei loh result danglam a thleng thei ve fo a, chak tur sawi lawk ngawt a remchang lo.
Ram pahnih te hi group A-ah an awmdun a, an match hmasa berah intawngin Lionel Scaloni naute 2-0 in an chak - Julian Alvarez leh Lautaro Martinez ten goal khat ve ve an khung, anni pahnih zinga a tu emaw zawk hi chuan bul an ṭan ang.
World champion training neih dan en chuan, coach Scaloni-a'n Rodrigo De Paul leh Alexis Mac Allister te kiangah tu nge a khelh tir dawn hriatthiam a harsa. Leandro Paredes, Gio Lo Celso leh Enzo Fernandez te zinga tu emaw berin hmun an chang ang.
Chelsea midfielder Enzo hi Qatar World Cup a champion theih nana player pawimawh a ni a, chutihrualin tun hnaiah ram tan a boruak a lian tawk lo deuh, elpui hautak a nei a, heng zingah hian a rawn dawk chhuak thei ang em tih chu hriat chakawm tak a ni.
Captain Messi a dam ṭha a, tawnhriat nei ṭha Angel di Maria chu inkhel boruak sangah a rintlak leh bawk ang - training an neih dan thlir chuan player la naupang deuh Alverez chu bul ṭan tura ngaih a ni. Manchester City striker hi Messi kianga khel thiam sa a ni.
Alvarez a buk a rih viau lai hian Inter Milan striker Martinez hi dah hniam theih a ni lo a, tun tournament bikah phei chuan Argentina hmatawng hlauhawm bera chhal ngam a nih avangin Scaloni tan duhsak loh ngawt theih a ni lo ang.
La Albiceleste hi chak chiang tura dah ngawt chu a remchang bik lo. Quarterfinal-a Ecuador an hmachhawn ṭum pawhin an goal neih an hum lo a, penalty hmangin a vannei zawkah an ṭang - keeper Emiliano Martinez vanga tlang tiin an sawi theih.
Aston Villa goalkeeper Martinez hi a rintlak a, a bik takin penalty an pet ṭumin a che ṭha ṭhin. Penalty erawh vannei leh vanduai inkar chauh a nih tawh avangin innghah nana hman a fuh ber lo ang, hun pangngaia inchinfel theih chu a ṭha zawk.
Argentina mipui leh khawvelin a hmuh chak ber erawh Messi a ni leh dawn. Kum 37 mi Messi hian a chawlh hun tur la sawi chiang lo mah se atan Copa America bik chu a hnuhnung ber a nih tawh a rinawm, nomawi nena hun tawp hman a chak ang.
Canada hi awlsam taka pal liam mai theih tur chi erawh an ni bik lo - Argentina hneh lo mah se Peru an hneh bakah Chile nen an inhnehtawk a, chumi hnuah Venezuela hneha semifinal thleng hi an ni. Bayern Munich defender Alphonso Davies chu an player pawimawh leh hmuhnawm a ni leh ang.