Euro 2024 - Goal 108 a lut tawh!

European Championship 2024-ah quarterfinal khelh zawh a ni tawh a, match thum chauh khelh tur a awm tawh. Match 48 khelh a ni tawh a, goal 108 a lut tawh a ni.

Entu an ṭhahnem

Euro 2024 hi Germany-in khawpui 10-ah a thleng a, entu zat belhkhawm hi 2,492,720 niin match tina 51,932 entu awm ang zel a ni.

Stadium 10 zinga panga Olympiastadion (71,000), Allianz Arena (66,000), Signal Iduna Park (62,000), MHPArena (51,000) leh Arena AufSchalke (50,000) ah mipui sing nga an leng.

Stadium dang panga Volksparkstadion (49,000), Merkur Spiel-Arena (47,000), Waldstadion (47,000), RheinEnergieStadion (43,000) leh Red Bull Arena (40,000) ah te mipui singa leng pha lo mah se chawhruala entu zat hi 51,932 a ni pha tho.

Goal 108 chu

Euro 2024-ah goal 108 a lut tawh a, match 48 khelh tawh niin match tina 2.25 goal lut ang a ni a, minute 40 dana goal khat lut zel ang a ni.

Inkhelh hun chhung minute 90 hi minute 15 zela ṭhendarh ni ta se, minute 16-30 inkarah goal a lut hnem ber - goal 20 ngawt a lut. Minute 1-15 inkarah goal 14 a lut a, minute 31-45 inkarah goal kua a lut a, first half injury time-ah goal thum a lut.

Second half ṭan chiahah a goal lut a tam a, minute 46-60 inkarah goal 17 lutin minute 61-75 inkarah goal 16 a lut a, minute 76-90 inkarah goal 15 a lut leh bawk. Hun tawp lamah team-in risk an la nasa tih a lang a, second half injury time-ah goal 12 ngawt a lut.

Knockout stage chinah minute 90 chhunga an inhnehtawk chuan extra time an khel a, first half leh second half-ah goal khat ve ve a lut.

Germany leh Spain-in goal 11 ve ve khungin an khung tam ber a, La Roja hian semifinal an khelh dawn avangin Germany hi an tlansan thei ang. Semifinal khel tur dang Netherlands (9 goals), England (5) leh France (3) te zingah Les Bleus-in goal thum chauh an la khung.

Tu nge che ṭha?

Ball possession aṭanga teh chuan Portugal an che ṭha ber a, 64.8% ball an chang. Mahse, Cristiano Ronaldo telna team hian semifinal an thleng pha lo. Germany (59.2%), England (58.6%), Spain (57.2%), Croatia (55.3%) leh Netherlands (55.2%) te an dawt. Semifinal lut zinga mi Les Bleus erawhin 50.5% chiah ball possesion an nei pha a, 13-na an ni pha chauh.

Pass tam lam aṭanga teh chuan Portugal an che ṭha ber a, 3643 pass an nei a, chung zinga 3303 chu a dik. England (3388), Germany (3235), Spain (3031) leh France (2877) leh Netherlands (2442) ten an dawt. Semifinal khel tur team pali hi a sang paruk zingah an tel vek avangin football-ah hian che ṭha turin pass tam hian pawimawhna thuk tak niin a ngaih theih.

Pass dik ngah zawnga teh chuan Germany pass dik percentage chu 91.2% a ni a, France (90.8), Portugal (90.4), Spain (90.2), England (90), Croatia (89.3), Italy (88.8) leh Netherlands (88.6) ten an dawt a ni.

Goal khung tam

Euro 2024-ah hian goal thum khung tawh player pali an awm a, chungte chu Georges Mikautadze (Georgia), Jamal Musiala (Germany), Cody Gakpo (Netherlands) leh Ivan Schranz (Slovakia) te an ni.

Goal khung zat a inang a nih chuan assist tam en tur a ni a, chumi zawhah chuan player khel tlem zawk chu dah pawimawh leh tur a ni. Mikautadze leh Gakpo ten assist vawi khat ve ve an nei tawh a, Georgia forward hian minute a khelh tlem zawk avangin top scorer a ni mek.

Chutihrualin Gakpo hian match khelh hmabak a la nei a, goal emaw assist emaw a neih chuan top scorer a la ni thei thung. Khelh hmabak la nei zingah Jude Bellingham, Harry Kane, Dani Olmo, Fabian Ruiz leh Donyell Malen ten goal hnih ṭheuh an khung tawh a, top scorer chawimawina an la beisei thei ang.