Olise-a'n Bayern a zawm

Bayern Munich chuan Crystal Palace aṭangin winger Michael Olise chu euro maktaduai 60-in (£50m) an lalut. Kum 22 mi France U21 forward hian season thum chhung Palace tan inelna hrang hrangah match 90 a khel.

Olise hian July 2021 khan Palace hian Reading aṭangin £8m-in an lalut a, Eagles tan hming a chher a hle. Season liam ta khan Olise hi hliam vangin league match 19 chauh khel mah se goal 10 a khung pha tho.

Olise chuan, "Club lian tak tana ka khel tur hi ka lawm hle. Ka tan chuan chona lian tak a ni a, chona hmachhawn hi ka châk. Bayern tan hian ka theihna lantir ka châk a, nomawi ṭhahnem tak chawipui ka duh a ni," tiin a sawi.

Euro 2024-ah Olise hi tel lo mah se Olympics khel tur zingah koh a ni a, kumin inelna hi Paris-ah khelh a ni dawn. Les Bleus hi an ram football legend Thierry Henry-a'n a enkawl dawn.

Chelsea leh Newcastle United pawhin Olise hi lak an duh a, mah se Allianz Arena pan a thlang ta zawk. Bayern Munich hian season liam ta khan Harry Kane an lalut a, nomawi pakhat mah an chawi lo.

Bavarians hian result an neih ṭhat loh avangin Thomas Tuchel an ban a, a thlak nan Vincent Kompany an lalut. Belgian manager hi season liam ta khan Burnley a enkawl a, Premier League aṭangin an relegate.

German club ṭha Bayern hian Fulham aṭangin Joao Palhinha an lalut hnai bawk. Portuguese midfielder hi pound maktaduai 42 man tura ngaih a ni a, a chet ṭhat dan a zira pound maktaduai li pek belh dan a awm bawk ang.