Hamilton a chak ve leh ta!

Dawhthei takin a awm a - beidawng duh hauh loin a nghak ngar ngar a, tunah chuan Lewis Hamilton pawhin a duh leh beisei zinga pakhat chu a tihlawhtling ve leh ta a, phurna a nei thar ngei ang.

Pathianni zan khan Formula 1 British Grand Prix tlan a ni a, tualchhung tlangval Hamilton chu pakhatna a ni. Car intlansiakna sang berah hian kum hnih leh thla sarih hnuah a chak ve leh ta chiah a ni.

Mercedes driver Hamilton hi theihna nei sang bik a ni a, vawi sarih ngawt a champion tawh. Mahse, tun hnaiah Red Bull leh an driver ṭha Max Verstappen a ngam lo a, chak ni hmel a hmuh lohna a rei ta vang vang hle.

A vawi kua nana British GP-a hnehna changtu Hamilton chuan, "Intlansiak tam tak ka hmachhawn tawh a, hun hlimawm pawh ka tawng hnem tawh. Tun ṭum hi a tawpa ka lawm ber ṭum a la ni hial awm e.

"A nihna takah chuan ka nghak rei a, beidawng lo mah ila ka tan chak ni a lo thleng ve tawh dawn lo emawni tih chang ka nei, chutiang zawng zawng hnuah chuan ka chak ve leh ta," tiin a sawi.

Hamilton hnungah hian driver championship hmahruaitu Verstappen a thleng. Dutch tlangval hian a nomawi humhim a tumna lamah nek buaitu a nei mek - McLaren driver Lando Norris chuan thlahfal duh loin pathumnaah a thleng bawk.

Tun season hi Hamilton-a'n Mercedes car a khalhna hnuhnung a ni tawh dawn, season tharah chuan Ferrari team a zawm ang. Champion tam lamah Michael Schumacher (7 titles) nen an intluk mek - Italian team hlun nen hian record siam a tum dawn a ni.

July 21, Pathianni zan dar 6:30 hian Hungaroring tlan kawngah Formula 1 Hungarian Grand Prix an tlan leh ang.