A hmasa berah Bagnaia

MotoGP champion lai Francesco Bagnaia chuan kawng dik a zawh zel - Pathianni zana tlan zawh tak German MotoGP-ah hnehna a chang a, a nomawi kawl lai humhim turin dinhmun ṭha a luah.

Sachsenring tlan kawnga intlansiakah Italian tlangval, Ducati Lenovo bike khalhtu ni bawk hian Jorge Martin a lehpel ta a ni. Inelna zawh dawn hnai, lap hnih chauh awm tawhah Martin hian hma hruai mah se a chesual a ni.

Bagnaia chak ni hian Marquez unau chuan thil mak danglam tak an thlentir, an unau hian dawhsan (podium) an lawn phak - a upa zawk Marc chu pahnihna niin a nau Alex chu pathumna a ni, hetiang thil hi kum 27 hnua a thlen leh vawi khatna a ni hial.

Spanish rider Martin-a'n sprint race lamah hnehna a chang a, intlansiak pangngaiah pawh a hmasa ber aṭanga bul ṭanin a dinhmun pawh a ṭha hman hle, point 15 ngawta hma a hruaina chu a belhchhah ngei dawn ni pawhin a lang hman.

Mahse, a tawp dawnah a chesual ta mai si - tun hnai a zawna vawi li chak thei Bagnaia a rawn lang chhuak a, tunah chuan point 10-in hma a hruai fal ta zawk, intlansiak pakhatah an dinhmun erawh a la inthlak thei reng.

Italian rider Bagnaia chuan, "A awlsam lo hle - Jorge kha a tlan chak em em a, a tir lamah tihsual nei ve zeuh zeuh mah se a hmahruaina kha a nghet hle, a tawpa a vanduai erawh a pawi ka tih pui takzet.

"Sachensring tlankawngah hian hnehna ka chan vawi khatna a ni a, ka tan chuan thil lawmawm leh chhinchhiah tlak bik a ni a, inelna neih zel turah pawh inrintawkna min siamsak," a ti.

Khawvela bike intlansiakna sang leh ngaihhlut hlawh ber hi tun thla chhung chu an chawl rih dawn. Season chawhnu lam atan August thlatir hian Silverstone tlan kawngah British Grand Prix an tlan leh ang.