Fiahna paltlangtu Carlos Alcaraz

Carlos Alcaraz chuan Wimbledon nomawi humhim tumin theihtawp takmeuh a chhuah a, kawng harsa leh hautak karah nghet taka ding chungin quarterfinal an inhlangkai, a khingpui Ugo Humbert chu 6-3, 6-4, 1-6, 7-5 in a hneh.

Pathianni zan fourth round inkhel dangah, world number 1 Jannik Sinner pawhin Ben Shelton chu 6-2, 6-4, 7-6(9) in a hneh a, tun hnai kum thum chhung chu a zawnin Wimbledon quarterfinal a lut ta.

Wimbledon bikah Sinner-a'n final a la lut ngai lo, kuminah hian number 1 ni chunga a inlan avangin beisei a nei sang, a hmabak erawh a la hautak chho dawn hle a, player ropui dangte angin a rilru a paukhauh tawk em tih chu fiah a ni ang.

Alcaraz a chak

Carlos Alcaraz hian a match hmasa lamah fiahna hautak a paltlang tawh, seeded 29-na Frances Tiafoe nen set nga an khelh ṭumin a vannei zawkah a ṭang a, tun ṭumah pawh awlsam taka chak chu a ni bik lo.

Chutihrualin, kum 21 mi Alcaraz hian boruak sang a ngam em em mai a, hun harsaah a chiai ngai tlat lo. French Open nomawi chawi hlim a ni a, inelna lianah a zawna match 11 a chak tawh avangin inrintawkna pawh a nei sang hle.

Spanish tlangval Alcaraz chuan, "Veikhawr hmachhawn hi chu a danglam riau ṭhin a, keimah zawk ka lo insiamrem zung zung a ngai ṭhin. Chutiang karah chuan ka beisei aia ṭhain ka khel chhuak," tiin a khelh danah a lungawi.

Seeded pathumna Alcaraz hian a match lehpekah chuan Tommy Paul a hmachhawn ang. Paul-a hi Queen's Club champion a ni a, tun hnaiah a khel ṭha thei hle, ani hian Roberto Bautista Agut 6-2, 7-6 (7-3), 6-2 in a hneh ve thung.

Sinner a nghet

Tennis khelhna hmun a inang lo a, world number 1 Jannik Sinner tan grass court hi hmun duhthusam a ni bik lo. Chuvangin Wimbledon hi a tan thil awlsam a ni lo, mahse fourth round thleng chuan nghet takin a ding thei.

Sinner-a khingpui Ben Shelton hi service na leh ṭha tak mai a ni a, vawi 15 ngawt aces a siam thei. Grass hi tennis ball kal chakna hmun a nih avangin service nate tan hmun ṭha a ni, hetiang lakah hian Sinner a dingchang.

Kum 22 mi Sinner hmabak chu Daniil Medvedev a ni dawn - Russian tlangval Medvedev hi grass-a inkhelh harsa titu ve tho a ni a, chutihrualin player ṭha tak ve ve an nih avangin inkhel a hmuhnawm dawn.

Seeded pangana Medvedev hi Grigor Dimitrov nen inhmachhawnin set khat pawh an khel zo hman lo. Medvedev-a'n 5-3 a hma a hruai laiin a khingpui Dimitrov hi khup hliam vangin a khel chhunzawm thei lo, thahrui a khek theih phah a ni.