England-in Jack Grealish an ko

Aston Villa midfielder Jack Grealish chu England squad-ah a vawi khat nan koh a ni a, UEFA Nations League khel tur Three Lions squad aṭang hian Marcus Rashford leh Harry Winks-te chu an inhnukdawk thung. 

Kum 24 mi Grealish hi England Under 21 tan erawh a lo khel tawh a, tuna England coach Gareth Southgate-a enkawlna hnuaia 2016 Toulon Tournament nomawi chawi zingah khan a tel a ni. 

Manchester United forward Rashford chuan Three Lions squad aṭanga a inhnuhdawh chhan sawiin, "Hrehawm ka ti takzet a, ka team-te hnualna thlentu nih hi ka duh lo. Mahse, UEFA Nations League khelh hi ka tan chuan a hma mah mah a ni. 

"Ka theihtawp ka chhuah a, mahse club leh ram tana a ṭha thei ang bera season ṭan leh turin inbuatsaih ka mamawh zawk a ni. Ṭhiante u, duhsakna ka hlan a che u - in lam aṭangin ka lo ṭan em em ang che u," a ti.

Tottenham Hotspur midfielder Harry Winks pawhin England squad-a zawm theih loh chhan sawi chiah lo mah se inhnuhdawh ngaia a awm chu hrehawm a tih thu a sawi ve bawk.

Hetihlai hian Grealish chuan, "Ka tan chuan mumang a thleng dik ta a ni," tiin Three Lions squad-a koh a ni chu a lawm thu a sawi a, Southgate chuan Inrinni khan Conor Coady leh Ainsley Maitland-Niles-te a lo ko tawh.

England hian September 5 zanah Iceland lenchilhin UEFA Nations League-a an match hmasa ber an khel ang a, September 8 zanah Denmark an lenchilh leh bawk ang. 

Goalkeepers: Dean Henderson, Jordan Pickford, Nick Pope

Defenders: Trent Alexander-Arnold, Conor Coady, Eric Dier, Joe Gomez, Michael Keane, Ainsley Maitland-Niles, Tyrone Mings, Kieran Trippier, Kyle Walker

Midfielders: Phil Foden, Mason Mount, Kalvin Phillips, Declan Rice, James Ward-Prowse, Jack Grealish

Forwards: Tammy Abraham, Mason Greenwood, Danny Ings, Harry Kane, Jadon Sancho, Raheem Sterling