Raducanu leh Gauff zinkawng a tawp

Tennis ngaina tak British miten ṭan rawn tur an duh a, beiseina sang tak nena an thlir Emma Raducanu erawh an duh ang result a neih pui hleithei lo, fourth round inkhelah Lulu Sun hneh loin a tla.

Pathianni zan khan Centre Court-ah Raducanu hi a inlan a, mipui thawm pawh a ṭha thei hle - mahse, qualifying paltlanga inlan New Zealand nula hian 6-2, 5-7, 6-2 in a lo hneh.

Raducanu hian kum 2021 khan khawvel barakhaihin US Open nomawi a chawi a, a hnu lamah hliamin a tibuai ngun hle, beisei a la phak leh thei rih lo a, chutihrualin hliam na tak nei loa tournament a khel thei kha lawmna tur a ni ve bawk.

Kum 21 mi Raducanu chuan, "Kan inkhelh hma zan khan ka hnungzâng a kham viau mai a, chu chuan inkhelah khan nghawng a nei deuh, a bik takin service kha a harsat phah ve deuh," a ti a, hliam na tak ni lo mah se 100% in a khel lo niin a sawi.

Inkhel dangah Coco Gauff a chak lo - American tleirawl hi amah ang bawka American player Emma Navarro lakah 6-4, 6-3 in a chak lo a, season dang ang bawkin Wimbledon title chu a la phak leh rih ta lo.

Hmeichhe inelna huangah world number 2 Iga Swiatek a tla tawh a, tunah number 2 Gauff a tla ve leh ta chiah, player langsar tak takin inelna an mangṭha chhunzawm ta zel a ni.

Ranking sang zual 10 zingah player pahnih - seeded palina leh pasarihna Elena Rybakina leh Jasmine Paolini te chauh an dam tawh a, beisei loh result a thlen tam avangin anni pahnih pawh an fimkhur a ngai hle ang.

Hmeichhe singles inkhel dangah Jasmine Paolini a vannei. French Open finalist Paolini hi Madison Keys nen an inhmachhawn a, player pahnih te an inkhel tawk takzet; 6-3, 6-7 (6-8), 5-5 a nih laiin Keys a inhliam.

Set hnuhnung ber an khel zo hman teuh hle a, mahse a khel bawr hliam vangin Keys a inkhel chhunzawm ve thei ta lo a, mittui nen Court One a chhuahsan a, a khingpui Paolini a vanneih phah thung a ni.

Paolini hian a match lehpekah chuan Gauff hnehtu Emma Navarro a hmachhawn leh ang.