Lazio tan Ciro Immobile a khel zel dawn

European Golden Shoe dawngtu Lazio striker Ciro Immobile chuan Serie A club tana khelh chhunzawm zel turin contract thar a ziak a, kum 2025 thleng Italian club tan a khel ang. 

Serie A season hman zawh takah khan Immobile hian goal 36-a khung a, Gonzalo Higuain-a'n Serie A season khata goal khung hnem ber record Napoli tana a lo siam tawh chu a nihrual a ni. 

Immobile hian Lazio-ah hian kum 2023 thleng cham turin contract a nei sa a, mahse Italian club hian European club lian dangten an hel striker thlun ngheh nan contract thar an ziahpui leh ta a ni. 

Kum 30 mi striker hian a contract hmasa ang chuan Italian club-ah hian season khatah euro maktaduai 3.5-a hlawh nia sawi a ni a, contract tharah a hlawh tih pun niin season khatah euro maktaduai li a hlawh tawh ang. 

Italy tan vawi 39 inlana goal 10 khung thei striker hian 2013-14 season-ah khan Torino tan match 34 khela goal 23 khungin a hming a chher a, Borussia Dortmund pan zui mah se a hlawhtling lo. 

German club-a a hlawhchham hnuin Sevilla leh Torino-ah loan-in kaltir a ni a, kum 2016 khan Lazio hi a zawm - Serie A club-a pan hnuah match 178 khelhsakin goal 125-a khung. 

Lazio tana goal khung tam lamah Silvio Piola (149 goals) leh Giuseppe Signori (127) chiah phak loin pathumna a ni mek a, tun ang renga goal khung a uar chuan Lazio tana goal khung hnem ber a la nih thuai a rinawm.