Chelsea & City Chanchin Tun ang hian tawp se playoff khelh a ngai dawn!

Krismas leh kumthar vuakveta Premier League result avangin English football a ngaihnawm thar. Vawi 20 khelhah point hmu tam bik an awm lo a, Manchester City leh Chelsea chu an point hmuh zat leh tehna dangah an inang chiah.

City aia Chelsea an dah san zawk chhan hi alphabetical order vang chauh a ni. Hetiang hian season tawp ta se, Premier League history-a a vawi khatna atan playoff kan hmu ang.

London lei a chim

Boxing Day-ah Chel­sea-in John Terry leh Diego Costa goal hmangin West Ham United an hneh a, Jose Mourinho hote'n harsatna an hmachhawn dawn lo niin a lang.

Amaherawhchu St Mary's Stadium an tlawh a, Southampton nen an inhneh­tawk. Southampton-in Senegal forward Sadio Mane hmangin minute 17-na lekah hma an hruai. Chelsea hi an talbuai dawn lo niin a lang a, inkhel an thunun a; nimahsela an khingpuiin goal venhim hna an thawk nghal. First half injury time-ah Chelsea-in an phu ang ngeiin Eden Hazard hmangin an sut. Second half-ah Chelsea an chungnung a, goal erawh an khung thei lo. Hun tawp hnaiah Saints midfielder Morgan Schneiderlin chu hnawhchhuah a ni a, goal erawh a luh belh tawh lo. Chelsea-in point hnih an hloh phawt.

Kumthar niah Chelsea-in White Hart Lane an tlawh a, Tottenham Hotspurs lakah goal nga an chhuah a, mualpho takin point an hlawh chhuak zo lo.

Chelsea-in Costa hmangin minute 18-na lekah hma hruai mah se Harry Kane a telna Spurs an ngam lo. Minute 30-na leh 52-naah Kane hian Spurs tan goal a khung a, hemi inkarah hian Danny Rose leh Andros Townsend te'n goal khat ve ve an khung a. Spurs-in Chelsea laka si an phurh hnuah 4-1 in hma an hruai a, result danglam tak a ni a, a makna belhchhahtu chu Chelsea hi Jose Mourinho enkawl a ni.

Darkar khat pelh hretah Hazard-a'n Chelsea tan beiseina thar rawn siam mah se Nacer Chadli hmangin Spurs-in goal ngana an khung zui. Hun tawp dawna John Terry goal chu inkhel result tilang mawitu chauh niin Chelsea 3-5 in an chak lo.

Chelsea champion kalkawng tiharsatu English forward Kane hi kum 21 chauha upa a ni a, tun season-ah inelna hrang hrangah goal 17 a khung tawh. Premier League-a khel zinga ani aia khung tam chu Serigo Aguero chiah a awm a, tunah hian Spurs-in contract pawtsei turin hma an la mek.

Chelsea hian Jose Mourinho enkawlna hnuaiah goal li emaw a aia tam an vawi khat chhuahna a ni a. Chumai a ni lo, an match hnuhnung pariatah vawi li chiah an chak. London club hi champion tura dah ngawt a harsa tawh.

City an tlawm ve lo

Krismas tuka West Brom-in Manchester City an mikhual ṭumin vur a tla nasa a, City an talbuai phah lo.

West Brom keeper Ben Foster chetsual zarah Fernando hmangin City-in minute riatnaah hma an hruai a, minute nga hnuah Yaya Toure-a'n penalty

aṭangin a khung a. Spanish midfielder David Silva-a'n darkar chanve pelh hretah khung belh lehin first half-ah 3-0 a ni.

Second half-ah City in goal an khung tawh lo a, mualneitu lamin Brown Ideye hmangin an khung. 3-1 a chak City-in point thum an hlawhchhuak.

November 28-ah Man­chester City-in Etihad Stadium-ah Burnley an mikhual a, David Silva leh Fernandinho te goal hmangin first half-ah 2-0 in hma an hruai a, point thum an chiang tlukah a ngaih theih.

Second half-ah thil­mak a thleng a, minute 47-naa George Boyd goal-in Burnley beiseina a pe a. Hun tawp hma minute kuaah Ashley Barnes hmangin Burnley-in an siphurh an sut a, 2-2 in inkhel a tawp. City vanneihna chu hemi ni vek hian Chelsea-in point hnih an hloh.

Kum 2014 a tawp a, Manchester City-in point hnihin Chelsea an la pha lo. Kum thar niah City-in Sunderland an mikhual a, first half-ah goal a lut lo. Second half-ah Yaya Toure leh Stevan Jovetic goal hmangin City-in 2-0 in hma an hruai a, inkhel thununtu pawh City an ni.

Sunderland an tlawm lo a, Jack Rodwell tauh luh leh Adam Johnson-a penalty hmangin Black Cats-in an si phurh an sut a, 2-2 a ni. City hi match zawna an talbuai nawn dawna a lan laiin tawnhriat nei player danglamna a lang a, substitute Frank Lampard-a'n chakna goal a khung.

A ngaihnawm lai chu Man City-in Chelsea an umphak theihna chhan hi Chelsea legend Lampard a ni a, Chelsea fapa rangkachak ni ṭhin hi London club champion kalkawng tibuaitu a ni.

Engtin nge ni zel dawn?

Vawi 20 khelh zawh­ah City leh Chelsea hi an chak zat, chak loh zat leh an draw zat a intluk a. Chu mai a ni lo, an goal khung zat leh chhuah zat thlengin an intluk.

Vawi 38 khelh zawha team pahnih hi kawng engkima an intluk chuan playoff khelh a ṭul dawn a ni. 1995-96 season khan Manchester United leh Newcastle United te chu playoff khel thei dinhmunah an ding hman a, league official-te chuan playoff khel tura inpeih sain ticket hial an print hman. Amaherawhchu season tawpah Man United an vannei a, playoff khelh a ṭul ta lo.

Engnge thleng dawn a hriat lo a, playoff em thlen rinawm lo mah se season tawp thlengin Chelsea leh Man City te hi chu an inum chho ngei dawn niin a lang.