FA Cup aṭangin Newcastle United an tla

Newcaslte United supporter-te'n an manager Alan Pardew bang turin an nawr nasa a, a tawpah suppporter-te duh dan hlawhtlingin Pardew-a'n Premier League club tho Crystal Palace a zawm. Newcastle hian Inrinni zan khan Pardew-a tel lo a ṭum hnih an khelhnaah Leonardo Ulloa goal vangin Leicester an hneh lo a, FA Cup aṭangin an tla.

Inkhel chu King Power stadium-ah Leicester City leh Newcastle United te'n kum thar nia Premier League-a an starting eleven aṭangin player pasarih ve ve an thlak danglam a. Newcaslte hian coach lailawk John Carver hnuaia an game hmasa berah Burnley nen 3-3 in an hnehtawk a, Leicester hian Liverpool an draw thung.

Inkhelh ṭan hmain Leicester manager Nigel Pearson-a'n FA Cup chu an ngaih pawimawh ber a nih loh thu a sawi a, starting aṭanga thlirin mualneitu ni mah se player chhe zawk an ni.

Amaherawhchu, Leicester-in bul an ṭan ṭha a, club tana vawi khat inlannaah Tom Lawrence-a'n yard 15 aṭangin goal a thun nghal teuh hle. Hemi hnu hian Newcastle attacking midfielder Remy Cabella goal khung mawi tak chu offside vangin pawm a ni lo.

Minute 39-naah goal kan hmu a, Anthony Knockaert cross chu Leicester forward Ulloa-a'n Newcastle defence zuan khumin a tauh lut a, Argentine forward hian goal dang khung theihna chance ṭha a nei leh bawk.

Newcastle United-in an siphurh sut turin an goal bawh a na tawk lo a, Leicester-in ball an chang tam a, chak an phu zawk bawk.

Leicester City boss Nigel Pearson chuan, "Premier League kan ngaih pawimawh ber a ni a, chutihrualin chet ṭhat lai chuan chak result neih zel a ṭha, khelh ṭhat ringawt a tawk lo. Squad kan hman thiam a ṭul a, chuvangin player ṭhenkhat khelhna hun ka pe a, hei hi kan kal zelna turah a pawimawh ang," tiin a sawi.

Newcastle enkawl lailawktu John Carver chuan, "Manager nghet ka nih duh thu player-te ka hrilh tawh a, tunah chuan mipui pawhin an hriat a ṭulin ka hria. Tunah chuan Alan-a a chhuak tawh a, a hma boruakah kha chuan kan duhdan sawi chhuahna chi a ni lo," tiin a sawi a, club neitu Mike Ashley nen manager hna chungchanga an la inbiak loh thu a sawi bawk.

Carver hian manager chhuak ta Pardew hnuaia a tawh hma khan Sir Bobby Robson hnuaiah Newcaslte hi a lo enkawl tawh bawk. Newcastle manager tura rinkai zinga mi Derby County manager Steve McClaren leh Hull City boss Steve Bruce te'n Pardew a kalsan hna ruak chelh an tum loh thu hi an lo sawi tawh bawk.