Torres thlirna hnuaiah Atletico an chak

Inrinni zan khan Atletico Madrid-in kum 2015-a La Liga match hmasa ber an khel a, Vicente Calderon-ah mikhual Lavente 3-1 in an hneh. Inkhel entu zingah Fernando Torres chu mipui zingah a tel a, tun January transfer-ah hian Torres hi a club hmangaih hmasa leh a larchhuahna Atletico chuan AC Milan aṭangin loan-in an lut a, amaherawhchu vawiin aṭanga Italian transfer window a inhawn dawn chauh avangin a inlan ve thei lo.

Inkhel chu kar hnih chhung thlasik chawlh an hman hnuah La Liga khelh chhunzawm a ni.

Champion lai Atletico Madrid-in inkhel hun chanve hma lam leh hnua lama France forward Antoine Griezmann goal hnih hmangin hma an hruai a. Levante-in Nabil El Zhar's goal hmangin beiseina nei mah se Uruguay defender Diego Godin-a'n Atletico goal thumna a khung a, harsatna nei loin 3-1 in an chak.

Atletico Madrid manager Diego Simeone chuan, "Griezmann hian tun hnaiah hma­sawnna nasa tak a nei a, goal a khung bakah hian field chhungah a ṭangkai a, a thawhrimna hi ka duh takzet a ni," tiin goal hnih khungtu a fak. Goal thumna khungtu fak chhunzawmin, "Diego hian tun season goal pawimawh tak tak a khung a, a khung chhunzawm zel ka beisei. Mize ṭha tak a nei a, team khaipa a ni," tiin a sawi.

Inkhel dangah Sevilla-in Celta Vigo an hneh a, Nicolas Pareja-a'n goal awmchhun a khung. Sevilla hian Elche nen 2-2 a inhnehtawk Villareal lehpelin palinaah an awm.

Ivan Cavaleiro goal hmangin Deportivo La Coruna-in Athletic Bilbao lakah hnehna an chang a; Tomer Hemed goal hnih hmangin player 10-a khel Almeria-in khual­mualah Malaga 2-1 in an barakhaih.

Nizan khan pangana Valencia leh hma­hruaitu Real Madrid te an inhmachhawn a, Barcelona leh David Moyes-a enkawl Real Sociedad an inkhel bawk. Table-ah Real Madrid-in point 39 hmuin hma an la hruai a, an hnuaia awm Barcelona leh Atletico Madrid te'n point 38 ve ve an hmu.

Torres chungchang bawk

Torres hian kum 2001 khan kum 17 leka upa niin Atletico Madrid tan a inlan a, match 244-ah goal 91 a khung. An hmelma Real Madrid pawhin lak an tum tih hetih hunlaia Real director of football Predrag Mijatovic chuan tun hnai khan a sawi chhuak. Mijatovic chuan, "Lak luh kan tum ngei a, pawisa kha kan buaina a ni lo. Club pahnih inhal lutuk kha a buaithlakna lai chu a ni," tiin a sawi.

Kum 2007-ah Liverpool-ah lut a, kum li chhung Anfield-a a cham chhung hian a hlawhtling hle. Chelsea-in pound maktaduai 50-in Spanish forward hi an lei chhuak a, London club hi Torres-a chet chhiat ṭanna chu a ni. Chelsea hi FA Cup, Europa League leh Champions League-ah Torres hian champion pui mah se match 172-ah goal 45 chiah a khung.

Jose Mourinho-a'n ram tana a kawppui Diego Costa an lak luh hnuah Torres-a tan Chelsea-ah a hmuh a awm tawh lo.

Season tir khan Italian club AC Milan chu loan-in a zawm a, kum chanve chhungin goal khat chiah a khung. Milan hian Torres hi contract nghet an ziah pui a, amaherawhchu tun dinhmuna beisei a phak loh avangin intuai hriam turin a lar chhuahna Atletico Madrid an chhuah. Milan hian season liam taa Serie A playmaker ṭha ber zinga mi Alessio Cerci chu Atletico aṭangin loan hmang bawkin an la lut thung. Torres ang bawkin Cerci hi Spanish club-ah hian a hlawhtling bik lo.

Atletico boss Diego Simeone chuan, "Torres hi min chhandam turin kan la lo," tiin a sawi a. Torres hian khelhna hmun chang turin chet ṭhat a mamawh dawn a, Nilani zan dar 1:30 hian Copa del Rey-ah Real Madrid an hmachhawn dawn a, hming chherna hun remchang a ni ang.