Messi bak dawng tur an awm lo - Iniesta

January 12, 2015 hian Zurich, Switzerland-ah FIFA Ballon d'Or dawng tur puan a ni dawn.

FIFA Club World Cup-ah Real Madrid an che ṭha a, Ballon d'Or dawng thei tura thlan chhuah player pathum zingah Cristiano Ronaldo chu rinkai a ni a, Lionel Messi leh Manuel Neuer te aiin a langsar zawk. Amaherawhchu, Andres Iniesta chuan a teammate Messi aia awm an awm loh thu a sawi.

Barcelona midfielder Iniesta chuan Marca hnenah, "Mi zawng zawngin ngaihdan an nei vek a, ngaihdan sawi chhuah a thiang. Ka tan chuan Messi bak Ballon d'Or dawng tur an awm lo. Ballon d'Or dawng tur hian title lak zat aiin a thlangtute ngaihdan a pawimawh zawk a, ka tan chuan Messi hi engtiklai pawhin pakhatna a ni," tiin a sawi.

Messi hian Ballon d'Or chawimawina ṭum li a dawng tawh.