Crystal Palace manager thar Alan Pardew
Premier League relegation zone-a awm mek Crystal Palace chuan Inrinni khan manager atan Newcaslte United boss hlui Alan Pardew chu kum thum leh chanve atan an la lut tih an nemnghet.
Kar hmasa Thawhṭanni khan Palace leh Newcaslte te hian zangnadawmna chungchangah inremna an nei tawh a, kum 53-a upa Pardew hian Palace leh Aston Villa te goal awm loa an inhnehtawk ṭum khan a hmunah a thlir.
Crystal Palace hian December 27, Inrinni khan an manager Neil Warnock an ban a, a aiah an player hlui Pardew an la lut. Pardew chuan, "Crystal Palace manager thar ka ni thei ka lawm takzet a ni. Helai hmuna mi zawng zawng hian ka chanchin an hria a, tunah chuan rahbi thar chuang kai kan hmabak a ni. Club chairman Steve (Parish) leh board te ṭanpuina zarah club history duhawm tak kan siam theih ka beisei," tiin a sawi.
Pardew hian kum 1987 aṭang khan Crystal Palace tan a khel ṭan a, a inkhelh hun lai hian midfielder niin 1990 FA Cup semifinal-ah Liverpool lamah chakna goal a khung. Wembley-ah chak zo lo mah se Palace history-ah Pardew hian hmun pawimawh tak a chang.
Newcaslte boss hlui chuan sawi chhunzawmin, "Newcastle ka enkawl thei kha ka inchhuang a, Mike Ashley leh club board te hnen aṭanga ṭawiawmna ṭha ka hmu thei kha ka lawm hle a ni," tiin a sawi.
Nizan khan Palace hian FA Cup third round-ah conference club Dover Athletic an hmachhawn a, January 10 hian Tottenham Hotspurs an mikhual ang. Tin, an khelmual Selhurst Park-ah February 11 hian a club hlui Newcastle United an hmachhawn leh ang.
Tunah hian Palace hi point 17 hmuin 18-naah an awm mek a, an chunga awm West Brom chu point khatin an pha lo a, an hnuaia awm Burnley nen an point hmuh zat a inang thung.