Lampard-a thutlukna vangin New York fans an thinur

Major League Soccer club New York City FC fans chuan an player Frank Lampard-a'n loan-a a khelhna Manchester City tana season tawp thleng khel tura thutlukna a siam avangin an thinur takzet.

Kum 36-a upa Lampard hian June 2013-a Chelsea-in an chhuah zalen hnuah New York a zawm a, hemi hnu hian loan-in Manchester City a zawm a. A contract hi hun rei lo zawk atana tih a nih angin tawp tawh mai tur a ni a, amaherawhchu a pawhsei takah chuan MLS season ṭantirh thla thum chhung a tel thei dawn lo.

MLS club New York City FC neitu hi Manchester City leh baseball club lar New York Yankees te an ni a, hei hi City tana Lampard-a khelh theihna chhan pawh a ni.

New York fans group 'Third Rail' chuan, "He thutlukna hi mipui zah lohna a ni. Fans ṭhahnem takin Frank Lampard-a'n Manchester City tan ni lo New York City FC tana a khelh dawn nia kan hriat avangin season ticket kan lei a. New York City ṭan turin kan inpeih a, mah se tuna thutlukna hian minti thinur takzet a ni," tiin thuchhuah an siam a. Third Rail chuan City chu club thuneitu ni mah se an thutlukna siam chu an hriat thiam loh thu an sawi tel bawk.

Lampard-a'n Manchester City a zawm tirh khan Arsenal manager Arsene Wenger pawhin a lo sawisel tawh a, Financial Fair Play an paltlang duh vangin English midfielder hian New York City hi a zawm phawt niin a lo sawi tawh.

Chelsea midfielder hlui hian tun season-ah City tan vawi 17 a inlan tawh a, goal ruk a khung tawh. A goal khung zingah a club hlui Chelsea laka City siphurh sutna goal a khung chuan sawi zui a hlawh hle bawk.

Premier League hi May 24, 2015-ah a tawp dawn a, thla thar hian Manchester City-in Champions League round of 16-ah Barcelona an hmachhawn dawn a, final hi June 6, 2015 a khelh tur a ni. Hei vang hian New York City thuchhuak chuan Lampard an chhawr theih hun tur an la hre loh thu an puang.