Stevie G leh Liverpool an inthen dawn ta

5th January, 2015

Steven Gerrard meuhin Liverpool a chhuahsan dawn ta si a, 'football-ah thil thleng thei lo a awm lo,' an tih hia dik tawlh tawlh mai.

Steven Gerrard leh Liverpool inkungkaih dan hi Ryan Giggs leh Manchester United inzawm dan te, Frank Lampard leh Chelsea inzawm dante ai pawha thûk zawka sawi ṭhin a ni. Amaherawhchu season tawpah Liverpool captain contract a tawp dawn a, chumi hunah chuan Gerrard leh Liverpool an inṭhen a ṭul tawh ang. Season thara club dang a zawm hunah chuan Paul Scholes, Paolo Maldini leh Giggs te angin 'one man club' a ni tawh dawn lo, hei hi Liverpool ṭantute lung tichhetu leh thin tiurtu chu a ni.

Liverpool captain Gerrard hian professional football khelh chhunzawm zel a tum a, Liverpool elpui thei club erawh zawm a tum lo - hei vang hian Major League Soccer club a pan ang. Ningani aṭang hian a duh chuan club dang nen pre-contract agreement a ziak thei ang a, chumi hunah chuan season thara a khelhna tur a chiang ang.

Thutlukna harsa Gerrard chuan, "Ka dam chhunga ka thutlukna siam tawha harsa ber a ni. Liverpool elpui thei team ka zawm dawn lo a, Liverpool ka hmachhawn dawn lo tihna a ni. He thutlukna ka siam chhan hi tawnhriat thar neih ka duh vang bakah football ka chawlhsan hnuah inchhirna ka neih loh nan a ni," a ti.

Liverpool khaw naupang, an khaw club liana captain ni zui ta chuan, "Tun season-a ka ball pet hnuhnung ber thlengin Liverpool tan ka theihna zawng zawngin ka khel ang," tiin theihtawp a chhuah chhunzawm tur thu a sawi.

Steven Gerrard hian Premier League title la lo mah se kum 2005 khan Liverpool hi Champions League nomawi a chawipui a, final-ah AC Milan lakah football khawvel hriatreng tawh tur 'comeback ropui' an lantir a, goal thum an chhuah hnua an si phurh an sut leh vek a, penalty-ah an chak. he inkhela Liverpool goal hmasa ber hi Gerrard hian khung ta lo se English club hian Italian club hi an lehthal tawh kher lo ang.

Gerrard hian Liverpool hi Champions League bakah UEFA Cup (1), FA Cup (2), League Cup (3), Community Shield (1) leh UEFA Super Cup (1) te a lakpui a; England tan vawi 114 khelin 2014 World Cup zawh khan ram tana inkhelh a chawlhsan.

An sawi zui zel Liverpool manager Brendan Rodgers chuan, "Liverpool tana Steven Gerrard-a pawimawh dan hi thu maia sawifiah chi a ni lo. Tunlai khawvelah chuan 'legend' tih ṭawngkam hi kan hmang nasa mah mah tawh a, Gerrard bik hi chu Liverpool Legend dik tak a ni," tiin a sawi.

A teammate Rickie Lambert chuan an captain chu a ngaihsan thu a sawiin, "Gerrard hian Mr Liverpool tih hi a inhmeh a ni. Football lama ka seilenna kawngah Gerrard hi a pawimawh a, ka tan chuan tun hun leh engtiklai pawhin a pawimawh ber fo ang. Liverpool supporter-te tan thil mak tam tak a tihsak ṭhin a, ka theihngilh thei lo a, supporter dangte pawhin an theihngilh bik ka ring lo," tiin a sawi. Lambert hi naupan lai aṭanga Liverpool supporter a ni.

Italian forward Mario Balotelli chuan, "Andrea Pirlo nen angkhatah ka ngai. A mit a fing a, ball pet a thiam a, a pet na bawk. Steven hi chuan engkim a ti thei. Club tan chuan amah ang player hmuh leh chu a har tawh khawp ang," tiin a sawi.

Club neitu John W Henry leh chairman Tom Werner te chuan thuchhuah inṭawm insiamin, "Player ropuiin min chhuahsan tur hi club tan chuan chhiatna a ni. Tun season bak a khel tawh lo tur hi a lungchhiatthlak hlein kan hria. Chutihrualin hetiang player ropui kan thawhpui thei hi kan inchhuang a, football tan history ropui tak a hnutchhiah a ni," tiin a sawi.

Barcelona lama kal ta Luis Suarez chuan, "Nang nen hian khelmuala ka hun ropui ber pawl ka hmang a ni... nang ang player ropui bula ka khel thei kha nihlawh ka inti hle a ni," tiin a thlah.

Gerrard-a pualin

Sapramah chuan player-te pual bikin hla an phuahsak ṭhin. Liverpool ṭantute chuan an captain Gerrard-a pual hian hla ṭhahnem tak an phuah a, chung zing aṭang chuan pahnih kan thur chhuak e.

#1 - Liverpool tana Gerrard-a hlut bik dan hi a hnuaia hla thu aṭang hian a chiang hle.

"Steven Gerrard is our captain,

Steven Gerrard is a red,

Steven Gerrard plays for Liverpool,

A Scouser born and bred."

*Scouser - Liverpool khuaa chengte sawina.

#2 - Beatles hla lar tak 'Let it be' thluka sak tur a ni. A hnuaia hla thu hi han zawm la, Gerrard-a tel loa English football a kal tur hi ngaihtuah tel ang che.

"When we find ourselves in times of trouble, Stevie G runs past me,

Playing the game with wisdom,

Stevie G,

And in my home, the Spion Kop,

e watch him jog, right in front of me,

Spreading balls with wisdom, Stevie G,

Let it be, let it be, let it be,

Stevie G, The local lad turned hero,

Stevie G

And when the jubilant Kopite people, All living in The Park agree,

That we all know the answer, Stevie G,

And although we may all be fooled, There is still a chance that we will see,

The footballing phenomenon, Stevie G,

Let it be, let it be, let it be,

Stevie G, Spreading balls with wisdom,

Stevie G

And when the night is cloudy,

There is still a man that we all see,

A young, committed Kopite, Stevie G,

Playing to the sound of music,

Stevie G runs past me,

Playing the game with wisdom,

Stevie G,

Let it be, let it be, let it be, Stevie G,

For we all know the answer, his name is Stevie G"