Stevie G a inpuang

Zirtawpniah Anfield chhuahsan a tum thu a puang a, Inrinni lam khan Steven Gerrard chuan he thutlukna a siam chhan hi a sawifiah.

Liverpool tana season 17 chhunga game 695 khel tawh chuan manager Brendan Rodgers nen an inkawm hnuah chhuah a tum tak thu sawi chhuakin, "Brendan nen kan inkawm a, he thil hi eng tikah emaw a thleng dawn tih hre mah ila a ngaihthlak a hrehawm a, he kan inkawm hi thutlukna ka siam chhan a ni ta," tiin a sawi.

Manager leh captain inkawmna thu hi sawi chhuak vek duh lo mah se Stevie G chuan tlema zawng chu a sawi lang a, "Club-a player pawimawh leh inkhel bulṭantu ni ve reng tan chuan manager nena kan inkawm dan kha chu a lungchhiatthlak a, chutih rualin thil awm dan hrethiam lo rual chu ka ni lo. Manager thutlukna ka pawm a, tunah hian inkhel bulṭantu ka ni phak emaw, bench aṭanga ka tlan lut emaw a nih pawhin ka theihna zawng zawng Liverpool tan ka hlan ang; nimahsela he kan inkawmna hi ka chhuah chhan chu a ni e," a ti.

Stevie G hian a khel phak vak tawh lo tih a hria a, kum 34 mi ni tawh mah se inkhelh zel a la duh si a, chhuah a thlang ta. USA lama kal ngei tura ngaih a ni a, amah ngeiin Liverpool hmachhawn a duh loh thu a sawi chiang tawh.

Mi tam takin Gerrard-a thutlukna hi an pawmpui a, Liverpool bench-a awm reng ai chuan hmun danga inkhel tura kal mai hi a finthlak zawkah an ngai. Liverpool fans tam tak an ṭap a, an hero berin Liverpool ni lo club dang kawr ha hreh loa kum upat lama Anfield chhuahsan a la tum ṭalh chu an hrethiam lo a, hmun danga kal loa football chawlhsan law law turin an duh.

Liverpool player ropui ber zinga an sawi ṭhinin a hun tawp lama Liverpool chhuahsan a hreh lo tlat mai hian titi a titam hle. Tun hnaiah an elpui Manchester United player pathumin (Gary Neville, Ryan Giggs, Paul Scholes) club danga kal aia an club chawr chhuahnaah ngei chawlh an puang anga chawlh puang ve tura an beisei laiin Liverpool kawr hlipa ram dang club kawr hak a tum ta hi nâ an ni. Nimahsela Stevie G hian kum 2005 khan Chelsea sawmna a pawm zet hnuah ngun taka inngaihtuahin a thutlukna a sût a, tunah pawh hian Liverpool fans chuan an captain hian hmun danga khelh a tumna rilru hi a thlak leh theih an la beisei hial a ni.

Gerrard hian a chhuah tum thu a puan avanga a teammate-te an ngui a hmuhin, "He thu hian a barakhaih niin ka hria a, club pumpuiin chanchin duhawm lo deuh a nei ang maiin an ngui a; nimahsela hetiang hi a ni tur a ni lo. Hringnun hi chu a kal zel dawn a ni... chutih rualin min dah pawimawhzia ka hmuhin a ropui ka ti a, min khawih takzet a ni," tiin a sawi.

Liverpool captain hian USA a pan dawn tih pawh a sawi chiang tawh a, a kalna tur club erawh a la thlang fel lo. Liverpool khaw pa chuan, "Ka dam chhungin Liverpool pawnah ka la cheng ngai lo a, a lunglenthlak dawn a, chutih rualin hun ṭha a inher chhuakah ka ngai," a ti.