Saina-in Sports Sawisel
Badminton star Saina Nehwal chuan 2015 Padma Bhushan award dawng tur zinga an tel loh avangin Union Sports ministry a dem thu na takin a sawi chhuak.
Saina chuan, "Badminton Association of India-in ka dilna hi Sports minister hnenah an thehlut a, Sports Ministry chuan ka dilna hi Home Ministry hnenah an thehlut lo tih ka hria a, Sushil Kumar chiah an thehlut. Anni hi chu min sawipuitu mai an ni a, engvangin nge kan pahnih hming an thehluh mai loh?" a ti.
Wrestler Sushil hian 2008 Beijing Olympic-ah bronze medal a dawng a, 2012 London Olympic-ah silver medal a dawng a, nikum khan Glasgow Commonwealth Games-ah gold medal a dawng bawk. Nikumah bik hian inelna lian tham dangah result ṭha a nei lo a, mi tam tak chuan Saina hi he chawimawina sang dawng thei tura an beisei a ni.
Saina chuan, "Indian Open, Australian Open Super Series leh China Open Super Series-ah nikum chhung khan ka champion a, Uber Cup leh Asian games-ah bronze medal kan dawng bawk a, hengte hi tehna ṭha tawkah an ngai lo em ni?" a ti.