City-in Lampard kan mamawh - Manuel pellegrini

Manchester City manager Manuel Pellegrini chuan, tun season champion nomawi inchuhnaah City-in Frank Lampard an mamawh thu a sawi.

Lampard-a loan hi December 31 khan a tawp tawh a; nimahsela hei hi pawt seiin tun season tawp thleng City-ah a khel dawn. Inremna hmasa ang chuan Chelsea chhuahsanin New York City a zawm a, USA-a khel tura ngaih a ni. Nimahsela Chelsea elpui Manchester City a pan teh daih a, kum 2014 chhung loan-in an hawh. Tunah chuan a loan hun an pawtsei a, season tawp thleng Man City-ah a khel dawn ta a ni. Chelsea chhuahsanin Man City-ah a kal a ni ta ber mai.

Pellegrini chuan, "Frank hian he hmuna khelh zel hi a duh a, amah pawh a hlim a, keini lamin kan mamawh takzet a ni," a ti. A tidik chiah a, tun hnaiah Sunderland an hnehna goal a thun a, Premier League-ah game 15 khelin goal nga a thun a, ṭum thum chiah starting eleven-ah a awm chungin goal pawimawh tak tak a thun.

Man City boss chuan kum 36 mi midfielder chu fakin, "Kan player pawimawh a ni a, a ṭangkai turzia kan hriat avangin season ṭan dawn khan kan lalut reng a ni," a ti.

Lampard hian Premier League-ah goal 176 a thun tawh a, midfielder ni chungin Premier League history-a goal thun hnem palina a ni phak.